Tang ki nongïalam kiba leit sha ka UDP ki paidbah ki neh ha Congress, kam ki Sohïong Congress

Shillong, Jylliew 26: Ki nongïalam ba thymmai jong ka Sohiong Block Congress Committee ki la kam ba dei tang ki nongïalam kiba bud ïa u MLA barim, Bah HDR Lyngdoh ban leit ïasoh noh sha ka UDP katba ki nongkyrshan jong ka party pat kim khih satia.
Haba kren bad ki lad pathai khubor hadien ka jingïalang kaba long ha Mawmaram, u Bah Hambert Thangkhiew, General Secretary ba thymmai ka Congress Sohiong u la ong, “Haba ïadei bad u paidbah ngi tip khambha bad dei kane kaba pynlong ïangi ba ngin lum ngin lang biang namar la shu ieh khunswet ïa ki kumto khlem ki nongïalam.”
U la pyntip ruh ba ha katei ka jingïalang ki la ïa kren ruh na ka bynta ban sei ïa u kyrtong ban aireng ha u 2023. “Ngi la don lypa u kyrtong bad ngin sa pynbna paidbah ha ka por kaba biang,” u la bynrap biang.
Katkkum ka jingong jong u, u kyrtong uba kin sei u dei u briew uba la don bynta lypa bad ki paidbah bad uba lah ruh ban ïa kit ïa bah ha ka imlang sahlang.
U Bah Hambert u ong ruh ba ha Sohiong hi ki don kiba ieit ïa ka party bad don ruh ki paidbah kiba ieit ïa ki ishu. Kumta u la ong ba mynta ki pynkhreh ba kin ioh ïa ka jingkyrshan naduh kiba ieid ïaka party bad ruh kito kiba ieid ïa ki ishu kiba ka seng kan sa shim nangne shakhmat.
U Vice President ka Meghalaya Pradesh Congress Committee, Bah Boldness Nongum pat ha ka jingkren u la ai ka jingïaroh ïa ka jingkloi jong ki nongïalam ba thymmai ban lum ban lang biang sa shisien ïa ki nongkyrshan ba radbah jong ka party ban pynkhreh na bynta ka elekshon.
Ha kane ka sngi, u Vice President u la plie ruh ïa ka ophis treikam jongka party ha Mawmaram hi.
Kumban shu kdew hangne, ha Sohiong haduh mynta, ki kyrtong kiba la tikna ban aireng ki kynthup ïa u Bah Samlin Malngiang MLA ba mynta na ka HSPDP, Bah HDR Lyngdoh uban sa pynïasoh sha ka UDP ha ka 29tarik mynta u bnai bad sa u kyrtong jong ka Congress.