Ym pat ïoh jingtip ka tnad Election halor ka rai ki 38 shnong ban pynphai noh ïa ki EPIC Assam

Shillong, Jylliew 26 : Ka Election Department haduh mynta kam pat ïoh jingtip ei ei halor ka rai jong ki nongshong shnong jong ki 38 tylli ki shnong jong ka West Khasi Hills District ba kin pynphai noh ïa ki EPIC ba ai da ka sorkar Assam.
“Haduh mynta ngim pat ïoh satia kano kano ka jingtip halor kane,” ong u Chief Electoral Officer ka jylla, u Bah Frederick Kharkongor.
Hynrei, u ong pat ba katkum ka Election Commission ka long ba hadba don kino kino ki jaka kynad, ka treikam beit ka status quo katkum ka rai jongka Supreme Court ha u 1991.
“Kumta, ngin hap ban bud ïa ka hukum jong ka Supreme Court jong u 1991 haba ïadei bad ki kam elekshon,” la bynrap biang u CEO.
Kumban shu kdew hangne, u MDC ka Rambrai Bah Bajop Pyngrope hadien ba u la wan ban ïalam ïa kynhun ki khlieh nongsynshar ban kynduh ïa u Symbud Myntri Rangbah ka Jylla, Bah Prestone Tynsong u la ong ba kitei ki 39tylli ki shnong lyngba ki Rangbah Shnong ki la dep soi ïa ka dorkhas ba ki kwah ban don ha Meghalaya bad ïa kane la ong ba ki la dep ban pynsngew ruh sha u Bah Prestone.
U ong ruh ba ha katei ka jingkynduh, ki la kyntu ïa ka sorkar ba kan pdiang ïa katei ka jingkyrpad jong ki ha shwa ba kan ïaid shakhmat na ka bynta ka jingpynbeit pud ha ka kylla kaba ar hapdeng u Myntri Rangbah ka Assam bad Meghalaya kaba la khmih lynti ba kan sdang noh shen.
Na ki 39 tylli ki shnong, kumba 20 tylli ki dei ki shnong Khasi bad 19 tylli pat ki dei ki shnong kiba bun ki dei ki Garo ba shong ba sah. U MDCu ong ruh ba kitei ki nongshong shnong ki la dep ruh ban pynphai noh ïa ki EPIC ba ai da ka sorkar Assam.
“Kadei ka jingshisha ba baroh ar tylli ki jylla ki ai ïa ki skim EPIC ha kine ki khyndiat snem. Kumta nga sngewkmen ba bun ki nongshong shnong na kitei ki shnong ki la pynphai noh ïa ki EPIC jong ka Assam bad kumta kane kan pynsuk ïa ki regional committee ban pynbeit ïa u pud u sam ha katei ka sector,” u la bynrap biang.
Hynrei haba ïadei bad ki nongshong shnong kiba thep vote baroh ar jaka, u CEO u ong ba mynta ki la ïaid shakhmat ban pynshisha naduh ki polling station haduh ki nongthep vote ruh kumjuh kiba don ha ki shnong khappud.