ïoh rung lang ka Shillong Lajong FC sha ka Quarter Final Durand Cup, yn shongshit ka nongbah Shillong

Shillong, Nailar 12 : Ka lympung ïalehkai jong ka Durand Cup 2025 kan shongshit bha mynta ka samoi ha nongbah Shillong hadien ba ka kynhun na ka jylla ka Shillong Lajong ka la ïoh ban rung lang sha ka Quarter Final.
Watla ka Shillong Lajong ka wan ha ka kyrdan kaba ar na ka Group E hynrei ka jingïoh rung jong ka sha ka quarter final kadei na ka bhah jong ki ar tylli ki kynhun kiba hakhmat eh na ki klob ba wan ha ka kyrdan ba ar.
Kane ka dei ka sien kaba ar ba ka Shillong Lajong ka la rung sha ka quarter final jong ka Durand Cup.
Lah ban kdew hangne ba baroh ki lahduh na baroh ki hynriew tylli ki group ki rung sha ka quarter final kynthup ïa ki ar tylli ki ki kynhun ba hakhmat eh kiba wan ha ka kyrdan ba ar jong ka miej kheiñ point na kitei ki hynriew tylli ki group.
Lah ban kdew hangne ba ka Shillong Lajong FC ka la jop ar tylli ki jingïakhun na ka Group E ha shwa ba kan shah rem noh ha ka kynhun ïalehkai ISL jong ka Nort East United FC da 2-1 kol ha ka jingïakhun kaba itynnad bha.
Kane ka kynhun ka la pynkhihwin ïa ki paidbah nongkyrshan ha ka jingïakhun sdang da kaba ïoh ban pynliem haduh 6-0 kol ia ka kynhun ïalehkai jong ka Malaysian Armed Forces. Dei na kane ka jingïoh thep bun kol ha ka jingïakhun sdang ba ka pynlong ïa ka Shillong Lajong ban ïoh ïa kane ka kabu ksiar khamtam hadien ba ka jingïakhun bad ka Rangdajied ka la pynlong ïa ka ban jop tang da 3-1 kol.
Lah ruh ban pynkynmaw ba ka nongbah Shillong kata ka madan Jawaharlal Nehru Stadium Polo ka la shah jied ban pynlong ia ka Quarter Final kaba nyngkong kaban long ha ka 16tarik mynta u bnai bad kumjuh ruh ïa ka semi final kaba nyngkong kaban long ha ka 19tarik.
Watla haduh ba thoh ïa kane ka khubor na ka liang ki bor pynïaid jong ka Durand Cup kim pat pyllait satia ïa ka prokram ïalehkai jong ka quarter final hynrei la khmih lynti pat ba ka Shillong Lajong FC kan ïoh ban ïakhun ha nongbah Shillong hi ha kane ka quarter final.