Shillong, Nailar 12 : Ka lympung ialehkai Second Division 2025 jong ka Shillong Sports Association kna sdang naduh ka 18 tarik mynta u bnai ha kaba 16 tylli ki kynhun ïalehkai la phiah ha ki lai tylli ki group.
Ha ka Group A bad Group B ki don mar san tylli ki team katba ha ka Group C pat kin don 6 tylli ki team. Ka Group A kan kynthup ïa ka Umpling, Jongksha, Mawpat, Mylliem Lum bad ka Lumshyiap.
Ha ka Group B pat ka kynthup ïa ka Laitkyrhong, Umphyrnai, Marbisu, Smit bad Nongmensong.
Katba ha ka Group C, ka kynthup ïa ka Mawryngkneng, Tynring, Sohryngkham, Umphrup, Sohiong bad ka Pay For Right Football Academy. Ha kane ka lympung ïalehkai ar tylli ki kynhun naman la ki group ryngkat bad artylli ki kynhun ba kiba wan ha kyrdan ba lai kiba ïalehkai bha kin rung pat sha ka quarter final.
Ki ar tylli ki kynhun kiba poi sha ka final kin sa kiew pat sha ka kyrdan First Division ha ka samoi ban wan.
Ha kajuh ka por ka kynhun kaba wan sha trai duh naman la ka group kan hap ban ïakhun ïa ka mini league jong ki lai tylli ki kynhun ba wan sha trai duh. Na kine ar tylli ki kynhun ki bym lah ban ialehkai bha kin hiar sha ka Third Division ha ka samoi ban wan.
Lah ban kdew hangne ba ha u snem 2024 ki don 13 tylli ki kynhun ha ki ar group kiba ïakhun ha ka Second Division. Ha kane ka samoi ka Meghalaya Police bad ka Nongkrem ki la kiew kyrdan ha kaba ka kynhun jong ki pulit ka la ïoh ban bat ia ka nam lahduh lyngba ka jingïashut tie-breaker.
Ha kane ka kynti ki don saw tylli ki kynhun na ka Third Division jong u snem ba la dep kiba la kiew sha ka Second Division. Kine ki kynthup ïa ka Mawryngkneng kaba bat ïa ka nam lahduh nangtanka Umpling kaba wan ha ka kyrdan ba ar bad ki kynhun ba rem ha ka semi final kata ka Mawpat bad ka Tynring.
Nangta ki don ruh artylli ki kynhun kiba shah pynhiar kyrdan na ka First Division 2024 bad kine ki kynthup ïa ka Umphyrnai bad ka Sohryngkham.
Ha kajuh ka por ka Nongmensong ka la ïoh ïa ka kabu ksiar ban ïohrung lang ha ka Second Division.
