Jowai, Nailar 12: Ka lympung ïalehkai phutbol bala pynïaid da ka Thadlaskeiñ Sports Association (TSA) West Jaiñtia Hills kaba la long mynta ka sngi 12 tarik u Nailar ha ki ar tylli ki kyrdan kata ka ‘Joybell Suiam Memorial 2nd Division Football League TSA’ bad ka ‘Kesilroy Pala Memorial Super Division TSA’.
Haka jingïakhun jong ka Joybell Suiam Memorial 2nd Division Football League TSA haka por 10 baje mynstep ka Tympang SC kala jop da 1-0 kol ïa ka Maya SC, ïa katei ka shikol na ka Tympang SC la thep da u Rejoy Dkhar haka minit ba 59.
Katba haka jingïakhun kaba ar ka Myngkrem SC kala jop da 5-0 kol ïa ka Pdieñlum, ïa kitei ki kol na ka Myngkrem SC la thep da u Roster Khynriam haka minit ba 1 & 53, u Dalamsarki Lapasam haka minit ba 45 & 47 bad u Onitender Tyngkra ha ka minit ba 69.
Haba phai sha ka jingïakhun jong ka Kesilroy Pala Memorial Super Division TSA hapdeng ka kynhun ïalehkai jong ka Wahiajer SC pyrshah ïa ka Lumphyrnai Sohphoh kila poi sha ka jingïakhaid khlem don kiba ïoh ban thep kol (0-0).
La pyntip ka jingïakhun lashai ka sngi 13 tarik u Nailar ha ka Joybell Suiam Memorial 2nd Division Football League TSA na ka liang ka kynhun Myntoilang i FC kan ïakhun pyrshah ïa ka Mukhla Veteran haka por 10 baje mynstep. Katba ka Mukhla Mission kan ïakhun pyrshah ïa ka Tyllilang I Moobakhon ha ka por 12 baje mynsngi.
Ha ka kyrdan jong ka Kesilroy Pala Memorial Super Division TSA ka kynhun ïalehkai jong ka Heiboriong i FC kan ïakhun pyrshah ïa ka Pohskhur Phyllong Ingkhaw haka por 3 baje nohphai sngi.
