Shillong, Nailar 12 : Ka kynhun ïalehkai jong ka Umlyngka ka la ïoh ban rung sha ka semi final ha ka lympung ïalehkai Third Division jong ka Shillong Sports Association hadien ba ka la lah ban pynliem noh ïa ka Sanmer ha ka jingïakhun ïa ka quarter final ba nyngkong kaba long hynne ka sngi Baar ha madan SSA Stadium, First Ground Polo Shillong.
Ka Umlyngka ka la jam shakhmat ha kane ka lympung hadien ba ka la ïoh ban pynliem da 7-6 kol ha ka jingïakhun kaba la kut noh ha ka jingïakhaid khlem da don mano mano ba ïoh thep kol hadien 90 minit jong ka jingïakhun.
Watla ka jingïakhun ha ka kylla step ka la kut noh khlem da don ba ïoh thep hynrei ka dei pat ka jingïakhun kaba shongshit bha.
Haba phai sha ka kylla miet jong ka jingïakhun ka Sanmer ka la ïoh bun bha ki kabu ksiar hynrei kim shym la lah ban thep kol. Bad dei da kane ka rukom ïalehkai ba ka Umlyngka ka la ïoh ban tehlakam ban pynpoi sha ka jingïakhun sha ka tie breaker.
Bad dei ha ka jingïashut penalty ba ka Umlyngka ka la ïoh ban rung lut baroh 7 ngut katba na ka Sanmer pat ka lait noh marwei.
Ban ïoh rung sha ka quarter final ka Sanmer ka la wan hakhliehduh jong ka Group A katba ka Umlyngka ka la wan ha ka kyrdan ba ar ha ka Group B.
Ka jingïakhun ha ka quarter final kaba ar kan long hapdeng ka Umrynjah pyrshah ïa ka Nongumlong ha ka por 1:45 baje janmiet.
