Shillong, Jylliew :Ki nongshong shnong jong ka shnong Pynthor Sohma, Ri Bhoi District lem bad ki shnong ba marjan ki la pynpaw ka jingsngew khia ka ba jur ha ka ba ïadei bad ka jingbym ïoh bording mynta la jan shi bnai kynthih ha ka ba ki la hap ban shong hapdeng ka jingdum.
Kane ka jingjia ka la wan long hadien ka jingsniew noh jong u transformer u ba don hapoh kane ka shnong.Halor kane na ka liang ki katto katne ki riew rangbah ki la leit mih sha ka ophis ka tnat MeECL ka ba don ha Damsite ban pynpaw halor kane ka jingeh ka ba ki ïakynduh namar ka jingsniew noh jong u transformer, hynrei haduh mynta kane ka kam ka dang sahkut kumjuh haduh mynta.
Na ka liang ki nongshong shnong ki la pynpaw ba ka jingsniew jong une u transformer ka la wanrah ruh ka jingduh nong ka ba khraw ïa ki nongshong shnong khamtam eh ïa ki khynnah skul ki ba la sdang ban pynkhreh ïa ki eksamin bapher bapher.
Kumta na ka liang ki paidbah nongshong shnong jong katei ka shnong lem bad ki shnong ba marjan lyngba une u kyrwoh ki kyrpad jur ïa ka tnat MeECL ba kan shimkhia lem mardor halor kane ka jingsniew jong u transformer khnang ba ki paidbah kin ïoh biang ïa ka jingshai kumba long baroh shikatta.
Na ka liang u Bah PS Giri u ba dei u nonghikai skul u la pynpaw ba u la lap ïa shibun ki jingdkoh ha ka liang ka pule puthi naduh ba ki la duh noh ïa ka bording ilektrik namar ki ba bun ki khynnah kim ïoh lad shuh ban pule kot ha ka por mynmiet.
Nalor kata u la ong ruh ba lada ka MeECL ka kloi ban pyntrei noh ïa utei u transformer hapoh katei ka shnong kumta ruh kan long ka jingkyrkhu ka ba khraw khamtam na ka bynta ki khynnah skul ki ba long ka lawei jong ka ri bad ka jaidbynriew.
