Hiar jurip ka Assembly Committee ïa ki jaka ri syiar ha Ri Bhoi, lap ba ka kam ri syiar ka ai jingmyntoi ïa ki nongrep

Nongpoh, Nailar 11: Ka Committee on Government Assurances ka State Legislative Assembly mynta ka sngi ka la hiar sha Ri Bhoi District na ka bynta ban leit jurip ïa ka Poultry Feed Manufacturing Unit bad ruh ïa ki Poultry farm breeding kaba don ha Umiam ba la pynïaid da ki riew shimet bad kumjuh ruh ki la leit ban jurip ïa ka Regional Poultry Breeding Farm Kyrdemkulai na ka bynta ban wad jingtip halor ka jingpyntreikam ïa kitei ki jaka ri syiar ba kynthup haduh ka ka rukom shna ïa ki jingbam syiar, ka jingpynmih ïa ki syiar bad ka jingpynïaid iew ïa ki syiar kiba mih na kitei ki jaka ri syiar.
Ha kane ka jingleit jurip la ïalam da u Bah Renikton Lyngdoh Tongkhar kum u Chaiman ka Committee on government Assurances bad la don ryngkat ruh u Dr. Celestine Lyngdoh MLA ka Umsning bad u member, u u Bah Olansing Suin kum u Member bad MLA ka Mawsynram, u Bah Mathew B Kurbah, member bad MLA ka Mawphlang bad la ryngkat lang ki ophisar na ka Committee bad na ka tnad Veterinary ka sorkar jylla.
Ha kane ka jingleit jurip ki la sdang shwa ïa ka jingjurip na Umiam bad ki sa leit jurip ban pynkut ha Regional Poultry Breeding Farm Kyrdemkulai, ha kaba kum ki dkhot ka Committee ki la ioh ban tih bniah bha na ki ophisar halor ka rukom shna ïa ki jingbam syiar, ki rukom pynkha pylleng ïa ki syiar bad ruh ka rukom ri syiar bad ruh kumno ki rukom ai jinghikai ïa ki nongrep halor ka kam ri syiar kaba long shi bynta ban kyntiew ha ka liang ka ioh kam ka ioh jam bad ruh ban kyntiew ïa ka ioh ka kot ki nongrep lyngba ka kam ri jingri.
Haba kren sha ki lad pathai khubor, u Chairman ka Committee on Government Assurances u Bah Renikton Lyngdoh Tongkhar, u la pynpaw ba kane ka jingwan jurip ka la pynhun ïa ki kum ki dkhot ka Committee, namar ha ka jingleit jurip naduh ki jaka ri syiar ki riew shimet ha Umiam bad ruh ha Kyrdemkulai ba la pynïaid da ka sorkar la iohi ba ka jingdon kitei ki jaka ri syiar ka ai jingmyntoi shisha ïa ki nongri syiar, namar ha katei ka jaka ri syiar ka sorkar ha Kyrdemkulai ym tang ba ki ri syiar bad ki ai ruh ka jinghikai ïa ki nongrep halor ka kam ri syiar kata naduh ka rukom pynkha ïa ki pylleng syiar, ka rukom ai bam ïa ki syiar, ka rukom pynheh pynsan ha kaba lada ngi lah ban pyndonkam hok kan ai jingmyntoi shibun eh ïa ki paid nongrep ka jylla.
U la pynpaw ruh kaba kham sngewkmen ka long ba ka don ka jingdawa kaba jur ïa ka doh syiar ha ka jylla, ha kaba tang na ka jylla ngin nym lah ban pyndap ïa ka doh syiar bad kas jylla ka dang donkam ban wan rah na shabar jong kiwei pat ki jylla ban pyndap ïa ka doh syiar ha ka jylla. La jin ba ka sorkar ka dang lah ban pynheh ïa ki kam ri syiar lyngba ki lad jingïarap na ka sorkar bad ryngkat ka jingïatrei lang ki paidbah ka kam ri syiar ka dei ruh kawei kaba kyntiew ïa ka ioh ka kot ki nongrep bad ruh ïa ka ioh ka kot jong ka jylla, u la ong.
Shuh shuh, u la bynrap ruh da kaba ong, ba ka Committee kan sa rah sha ka sorkar jylla halor kiei ki bynta ba ka la ioh lum jingtip na kane ka jingjurip, namar ka thong jong ka Committee ban wan jurip ïa kane ka jaka ri syiar ka long ban tip kham bha ba ka kam ri syiar ka dei ban ai jingmyntoi ïa ki paidbah bad kumba ka Committee ka la lap ruh ba ka Regional Poultry Breeding Farm ha Kyrdemkulai ka long shisha kaba mynta kan pynsngew ruh sha ka sorkar ba kan dang thaw ïa ki lad ki lynti ban dang pynjanai khnang ba ka kam ri syiar ha ka jylla kan long shisha kata ka jingai kam ai jam bad ruh ban kyntiew ïa ka ioh ka kot ki nongre bad ka jylla hi baroh kawei, u la bynrap.