Shillong, Nailar 11: Ki nongtrei ka 108 hapoh ka lama jong ka Meghalaya EMRI Workers’ Union (MEMRIWU) ki la thoh sha Mission Director of National Health Mission (NHM) Ramakrishna Chitturi, ha kaba ki la kyrpad ban pynlait noh ïa ka tulop kaba dang sahteng jong ki bad kiwei pat ki jingïoh jingmyntoi.
Kane ka shithi na ka union ka la pynpaw ruh ïa ki jingeh ba la mad da ki nongtrei kiba dei ki jingdonkam kiba manla ka sngi khamtam eh ha kaba ïadei bad ki jingkiew dor ki mar ki mata.
Katkum ka shithi la pynpaw ruh ba kane ka kam ban kyntiew bad pynlait ïa ka tulop la dep ban ïakren ha ka jingïalang kaba la long hapdeng ka union bad Mission Director ha ka 27 tarik u bnai Jymmang, 2025.
Ka union ka la ai jingmut ruh ïa ka jingdonkam ban kyntiew ïa ka tulop kumba T. 5,000 sha ki nongtrei.
“Ngi kyrpad ïa phi ban shim khia lem ïa kane ka jingeh khnang ba kan ym ktah ïa ka jingim jong ngi kaba manla ka sngi,” ong ka union ha ka shithi bad pynpaw ruh ka jingangnud ïa ka rai ba khatduh bad ka jingmynjur ha kaba ïadei bad kane ka kam.
