Ki khynnah skul kim dei ban buh ar ne lai jingmut, hynrei tang kawei ka thong : Wailadmiki Shylla

Mawkyrwat, ‘Nailar 11: Kum ka dak jong ka jingpynshlur bad ai mynsiem na ka bynta ki khynnah pule ba ki nangleh kham bha shuh shuh ha ki jingialeh eksam, na ka liang ka National People Youth Front (NPYF) jong ka South West Khasi Hills District mynta ka sngi ka 9 tarik u Nailar, 2025 ka la ïoh ban pynkup burom ïa ki 46 ngut ki khynnah pule kiba la leh bha ha ka eksam SSLC kiba ïoh 80% sha jrong bad HSSLC kiba ioh 75% sha jrong kaba dei jong u snem 2025 ha ka jingïalang ba la pynlong ha ka Hall jong ka Sngap Syiem College, Mawkyrwat.
Lah ban kdew ba kiba la shah pynkup burom ki don baroh 46 ngut kata SSLC ki don 35 ngut bad ha ka HSSLC ki don 11.
U Ma Wailadmiki Shylla uba dei u MLA ka Jowai Constituency bad kum u President jong ka NPYF Meghalaya State Unit bad Chairman ka MUDA jong ka Sorkar Meghalaya kum u kongsan ha ka jingkren ai mynsiem na ka bynta ki khynnah skul bad ki samla pule kiba la leh bha ha ka eksam SSLS bad HSSLC jong mynta u snem 2025 kim dei ban buh kano kano ka mynsiem jong ka jing-ar-tatien ne ar jingmut haba ki don ha ki jingïaleh hynrei ki dei ban don ne buh beit tang kawei ka thong khnang ba kin poi sha kliar jong u lum ka jingjop.
Ha ka juh ka por u la ai mynsiem ba lyngba ka jingjop jong ki khynnah bad ki samla pule ka dei ka jingjop ym tang jong ki shimet hynrei ka dei jong ki nonghikai bad ki kmie ki kpa ruh namar dei lyngba jong kum ki khynnah skul ki sa ïoh ban pule ne pynleit ïa ki jingmut ha kane ka bynta.
Haba u kren pat ha kaba ïa dei bad ka National People Youth Front (NPYF), Ma Shylla u la ong ba kum ka kynhun ka la don ka jingpyrkhar ba lyngba kane ka program kan long shibynta jong ka jingkyrshan bad ai mynsiem ïa ki ba kin nang leh khambha shuh shuh ha kiwei pat ki por nad ban long kiei re kiei ynda ki la pyndep ïa ki jingpule.
Nalor u la kongsan donlang u bah Carness Sohshang, Co-Chairman jong ka Meghalaya State Development Reforms Commission kum u symbud kongsan, u Dr. K.K. Nongsiej, President ka NPP South West Khasi Hills District Unit, u bah Mandilost Nongbri, Working President ka NPP Ranikor Block, u Valdo Lyngdoh, President ka NPYF South West Khasi Hills District Unit lem bad kiwei de kiba kynthup ïa ki khynnah skul kiba shah pynkup burom, ki kmie ki kpa bad kiba la shah khot sngewbha.
La pynïaid ïa ka jingïalang da u bah Firstmonthborn Lyngkhoi, ka program kyrpang u bah Thrangbor Wanniang bad ka Lashailang Myrthong bad ka jingkren khublei na u bah Iasohlang Nongrem, General Secretary ka NPYF jong ka South West Khasi Hills District.