Durand Cup 2025: Pynkut ka NorthEast hakhlieh duh jong ka Group E

SHILLONG, nailar 10: Ka NorthEast United FC ka la pynkut ïa ka jingïakhun jong ka hakhlieh duh jong ka Group-E hadien ba ka la ïakhaid da mar 2-2 kol ha ka jingïalehkai kaba khatduh pyrshah ïa ka Randajied United FC hynne ka sngi Nyngkong ha JN Stadium, ha Polo Shillong. Da kaba ïakhaid ka NEUFC ka la ïoh ban kamai 7 point naki lai sien ïakhun ha ka Group Stage.
Watla ka kynhun ïalehkai jong ka Randajied United kam don jingkyrmen shuh ban jam shakhmat ha ka wat ïakhun Quarter final ha kane ka lympung hadien ba shah rem ha baroh ar tylli ki jingïalehkai ba la dep, hynrei ki rangïalehkai ki la aiti lut khlem jingting ha kaba ka la ïoh ruh ban lamkhmat ïa ka jingïalehkai da 2-1 kol ha ka kylla step.
Ka NorthEast United FC ka la ïoh ban pynkhihjar nyngkong lyngba ka penalty ha ka minit kaba 24 kaba la shut da u Bekey Oram.
Hynrei tang hadien katto katne por ka Randajied ka la jubab da kaba pynïakhaid lyngba u Manbhakupa Iawphniaw (34’) hadien nangta u Danzel Umdor (44’) u la pynbud ïa ka kol kaba ar shuwa ban kut ka kylla step, kaba la pynlong ïa ka Randajied ban lamkhmat.
Haba wanphai ha ka kylla miet, ka NorthEast ka la hap ban ïakhun tyngeh katba lah ban pynphai ïa katei ka kol bad ha kajuh ka por ka hap ruh ban pyrkhing bha shadien namar ka jingstet rah bol kyndit kyndit da ki rangïalehkai ka Randajied.
Dei tad ynda la jam sha ka 76 minit ba u Jairo Bustara u la lah ban pynurlong ïa ka kol ban pynïakhaid na ka bynta ka NorthEast United FC, ha kaba haduh kaba kut ka jingïakhun ka la ïakhaid da mar 2-2 kol.
Ka jingïakhaid ka la pynïoh ruh ïa ka Rangdajied ban khur ïa ka point kaba nyngkong bad kaba khatduh jong ka ha kane ka lympung, katba ka NEUFC ka la pynneh ïa ka jingïalehkai khlem shah rem jong ka ban rung sha ka quaterfinal.