SHILLONG, Nailar 11: Ka Taekwondo Association of Ri-Bhoi District ha ryngkat ka jingïatreilang bad ka Meghalaya Taekwondo Association [MTA] ka la lah ban pynlong ïa ka prokram ai jinghikai lane ka Open Coaching Camp kaba 10 sngi bad ka selection trial na ka bynta ka National Games 2027 kaban sa long shen.
ïa kane ka prokram kaba la pynlong ha I.C.A.R Indoor Stadium, Ri-Bhoi ka long ban ithuh bad ban saiñdur ïa ki samla ïalehkai kiba don sap na kane ka thaiñ.
La sakhi ïa kane ka camp da ki katto katne ngut ki riew rangbah, kiba kynthup ïa u Jadumani Singh-General Secretary jong ka Meghalaya Taekwondo Association (MTA); u Deep Khatri-Joint Secretary ka UEKHDTA, u Raju Pahari bad u Bikon Deka (National Referee).
Kane ka prokram kaba long na ka bynta baroh ki nongïalehkai Taekwondo na ka thaiñ Ri-Bhoi, ka la ïohi ïa ka jingïashim bynta kaba shitrhem jong ki khynnah samla, ha kaba u Master Jeetu Bagdas, u wei naki coach uba la shemphang bha ïa kane ka jingïalehkai, u la pynïaid bad ai ka jinghikai kaba thikna ïa baroh kiba la wan ïa shimbynta.
Hadien kane la pynbud sa da ka jingpyrshang ban jied (selection trial) ïa ki nongïalehkai ba kynsai ki ban mihkhmat ïa ka District ha ka jingpyrshang jied ïa ki nongïalehkai jong ka Jylla lane ka State Selection trial na ka bynta ka National Games 2027.
