Nongpoh, Nailar, 10: Ka jingïaseng Kynthei ka Balang Presbyterian Nongpoh ba hap ha ka Ri Bhoi Synod mynta ka sngi ka la pynkut noh ïa ka taiew lehkmen ka jingïaseng Kynthei kaba la sdang naduh ka 4 tarik Nailar bad ba la pynkut noh mynta ka sngi U Blei ha ka ïingmane jong ka Balang Presbyterian Nongpoh.
Kane ka jingrakhe ïa ka taiew lehkmen ki kynthei la pynlong da ka jingïaseng Kynthei ka Balang Presbyterian Nongpoh bad mynta u snem la buh kyrpang halor ka phang: Ka jingpynjanai ba la sot na ka Shithi sha ki Nong Korinth na ka lynong kaba 13:11.
La sdang ïa kane ka jingrakhe da ka jingïaseng ha ka por 10.30 baje mynstep ba la wan ban ai jingkren da ka Kong B. Warlarpih bad bud sa ka jingïaseng ha ka por 1.30 mynsngi ba la wan ai jingkren da ka Kong Larisha Lyngkhoi, kiba la ban khia halor ka jingdonkamban pynjanai ïa ki Longkmie katkum ka saiñdur ba la buh da u Blei.
Ha kane ka jingrakhe ïa ka taiew kyrpang ki Longkmie, nalor ba la sam ïa ka ktien ka jong u Blei da kitei ki ar ngut ki shakri jong u Blei, ban sneng ban kraw ïa ki Longkmie halor ka kamram kum ki Longkmie la ka long ha ka kam ka jong u Blei ne ha ka kam ïing ka kam sem bad la pynphuh pynphieng ruh ha kane ka sngi da ki jingrwai Choir kiba shoh mynsiem ba la shim bynta naduh ki Samla bad ki Longkmie, ha kaba la pynkut pat ïa ka jingrakhe da kaba ïa rwai paidbah ïa ka theme song jong kane ka jingrakhe ïa ka taiew lehkmen ka jingïaseng kynthei.
