Wat ailad ba u ksuid un pynngop ïaphi ha u drok, kyntu ka Health Minister ïa ki samla

Shillong, Nailar 10 : Ka Myntri ka tnad ka Koit ka Khiah jong ka sorkar Jylla, Dr. M Ampareen Lyngdoh ka la kyntu ïa ki samla pule ka jylla ba kim dei satia ban shah pynngop ha ki buit bymman jong u ksuid uba pyrshang lut ki lad ki lynti ban pynngop ïa ki ha u drok.
“Ko khun samla phi lah ban la lah ban leh bha, ïoh ki mark kiba heh, phi don ki kmie ki kpa bad kumjuh ka sorkar kiba kyrshan ïa phi hynrei u ksuid pat u ap kmang ban pynshoi ïa phi,” ka la ong haba kren kum ka Kongsan ha ka jingïalang pynkup burom ïa ki 70 ngut ki samla pule kiba pass bha ha ka SSLC bad HSSLC kaba la pynlong da ka NPYF Shillong City ha kane ka sngi Saitjain.
Nangta, ka ong ruh ba ki samla pule kiba don shisha ïa ka thong ha ka jingim ki dei ban pynkhlaiñ ïalade ban lait na kitei ki jingshah pynshoi kiba lah ban wan bun rukom ban pynpulom noh ïa ka thong jong ki ha ka jingim.
“Kumta, to ngin shim ïa ka rai ban pynskhem ïalade da kaba ong ba u ksuid um ym ïohlad satia ban khring ne pynshoi ïa ngi ki khun samla,” ka la bynrap biang. Ka Myntri ka ong ruh ba ka sngewkmen haduh katta katta ban ïohi ba don ki samla pule kiba ïoh haduh 95 ne 97 persen bad kumta ka ong ba kine ki ai jingkyrmen ruh ïa ka lawei jong ka jylla.
Ha kajuh ka por ka Myntri ka la ong ruh ba ryngkat u Myntri Rangbah ka Jylla kumjuh ki Symbud Myntri Rangbah ka jylla ka kwah ban ai khublei lang ïa ki khun samla kiba la ïoh ïa ki mark kiba heh ha ki eksam bapher bapher la ka long naduh 50,60 ter ter 80, 90 bad haduh 100 persen
Tangbah, ka ong ruh ba khatduh hi na bynta ki samla pule kam dei satia ka pisa lane ki mark hynrei khatduh kadei ka jingsuk bad ka jinglait jong ki na ki jingpynshah pynshoi ha ka jingim.
Ka Myntri kaba dei ruh ha kajuh ka por ka MLA jong ka NPP na Shillong East ka la ong ba lada don kiba beiñ ruh hynrei kane ka sorkar ka la trei shibun bha na ka bynta ban wanrah ïa ka roi ka pa bad ka jingmyntoi ïa ki nongshong shnong.
Katkum ka jingong jong ka, watla ka jylla ka la kynjoh sha ka 52snem naduh ba ïoh la ka jong ka jylla ym pat don satia ki sorkar kiba lah ban pynïoh la ka jong ka State University, ban don la ka jong ka Engineering College, nangta la ka jongka Medical College bad khamtam eh ban peit ïa ki skul Lower Primary kiba la shu shah ieh kumto.
“Hynrei kane ka sorkar ka pyni sha ka pyrthei ba ngi la ïakhun ban ai ïa kaba bha tam sha ka jylla,” ka la bynrap shuh shuh.
Ka la ong ruh ba naduh u Naiwieng jong u snem ban wan, ka jylla kan sa sakhi ïa ka jingkylla kaban ai jingkyrmen ïa ki nongïakhun kam kaban pyntikna ba yn ym don shuh kiban ïoh leh thok ha ki eksam kam ha ki kyrdan kiba kham shapoh ba pynïaid da ka District Selection Committee.
“Kane kadei ka sorkar kaba trei hynrei ym don pat ba ïohi ïa ka. Ngi la pyrshang lut ban pynbha bad pynjanai ïa ki jaka sumar, bad ruh ban wanrah ïa ki skim kiba ïadei na ka bynta ki nongrep,” ka la bynrap shuh shuh.
Na ka liang ka Myntri ka ong ruh ba kum ka sorkar hi ki don ïa ka thong ban ai kaba bha tam na ka bynta ka bit ka biang jong ki paidbah ha baroh ki liang tangba ka shong pat ha ki paidbah ban bishar.