Nongstoiñ, Nailar, 10: Namar ka jingbym pat shah jong ka Joint Stock Company-TIER kaba pyntrei ïa ka surok Intermediate Lane Nongstoiñ-Wahkaji ïa ki kali heh bad kali rit, ban ïaid na ka jingkieng ha ka wah Kynshi kaba pynïasoh ïa ka shnong Mawthungkper bad Nongkynjang, ki nongïalam ka Hynñiewtrep Youth Council Lai Lyngdoh Circle, ryngkat ki nongñiah trok ha ka taiew ba la dep, ki la leit ban ïakynduh ïa u Project Manager u ba pynïaid ïa katei ka jingtrei bad ki la dawa ba un pyndep noh kloi bad ban pyllait noh ïa ki kali heh bad kali rit ba kin ïaid na katei ka jingkieng bad ki la ai por tang saw sngi ba kin pyndep, hynrei na ka liang ka Kompeni pat kam shym la leh kumba ka seng ka la dawa.
Kumta ha ka sngi saitjaiñ ba la dep ka 9 tarik mynta u bnai ki nongïalam bad ki dkhot ka seng, ki la hiar sha katei ka jaka ban pynkhuid ïa ki khohruh khohram, ki tim ki tam kiba ki nongtrei jong ka Kompeni kiba trei ïa katei ka jingkieng kim pat weng bad pynkhuid.
U samla Wilbirth secretary ka seng haba pyntip ha u nongthoh khubor u la ong ba ïa katei ka jingkieng la dep ban pyntrei bad kaba sah ka long satang kumba 10 %, kata satang ban ai rong bad ban pynbiang ïa ki design ha baroh arliang bad dei halor katei ka nongrim ba ka seng ka la pynbor ïa ka Kompeni ba kan pyllait noh ïa ki kali heh bad kali rit ba kin ïaid na katei ka jingkieng.
Utei u nongïalam ka seng u la ong ruh ba ha katei ka sngi na ka liang ki nongpynïaid jong ka Kompeni ruh ki la ïadon ryngkat bad hadien ba la dep ban pynkhuid bad weng lut ïa ki khohruh khohram na katei ka jingkieng, na ka liang ki nongpynïaid jong ka Kompeni ki la kubur bad mynjur ba naduh katei ka sngi baroh ki kali ki la lah ban ïaid lyngba katei ka jingkieng.
Nalor kata u la ong ruh ban katkum ka jingbtah jong ka kompeni la ong ba ki kali heh kiba kit mar ha ka jingkhia kaba 30 haduh 35 metric ton ki la lah ban ïaid lyngba katei ka jingkieng.
Ka jingpyllait ïa ki kali ban ïaid lyngba katei ka jingkieng ka la pynsuk shibun ïa ki kali heh kiba kit ïa ki mar ki mata ban leit buh sha Mawkyrwat, Rangblang, Umdohlun, Wahkaji bad kiwei kiwei ki jaka ha ki thaiñ Warsanlyngdoh bad ka la kham pynsting ruh ïa ki paitbah ban siew ïa ka bai kit bai bah ia ki mar ki mata.
