11 klur la tei ïa ka Loyola Block ka St. Xavier’s College ha Umoid, ot ribon u Bah AL Hek

Mawkyrwat, ‘Nailar, 10: U Myntri ka Sorkar Jylla Bah A.L. Hek ha ka sngi Saitjaiñ u la plie paidbah ïa ka Loyola Block jong ka St. Xavier’s College kaba don ha Umoid, South West Khasi Hills District bad kumjuh ruh ïa ka jingïalehkai ‘Mamma Mia’.
Lah ban kdew ba ïa ka Loyola Block jong ka St. Xavier’s College la tei ha ka jinglut kaba kot T. 11 klur ba kynthup naduh ki tiar ki tar, ki Board Digital bad ki Solar Power Unit bad kiwei de ki jingdonkam hapoh kane ka skulbah.
Haba kren ha kane ka sngi, Bah Hek u la ïaroh ïa ka St. Xavier’s College kaba la tei ïa kane ka shlem ai jinghikai ka ban pynmyntoi ia ki khynnah skul bad khamtam eh na ka bynta ka jingpynroi ïa ki sap ki phong sha ki samla pule kiba don sap ha ki bynta bapher bapher.
U la kyntu ïa ki samla pule ba kin sngewthuh bha ïa kano ka phang ne ka jinglah jong ki bad kano ka sobjek ba ki donkam ban pule da kaba peit bniah ïa ka jingdawa jong ki kam ha kum kane ka juk.
U la pynpaw ruh ba bun ki Chief Executive Officer jong ki kompeni heh hapoh ka ri India bad ha ka pyrthei ki dei kiba pule ha ki skul ne kolej jong ka St. Xavier’s. U la ai ruh ka jingkitbok kitrwiang ïa ka St. Xavier’s ba kan nangroi ha ka jingdon jong ki samla pule bad nangheh nang san ha ka jingshakri ïa ki khun samla ka thaiñ bad ka South West Khasi Hills District.
Ha kane ka prokram la ïadonlang naduh u Deputy Commissioner jong ka South West Khasi Hills District Bah B. Mawlong, u nongïalam ka BJP Bah M. Kharkrang, u Principal jong ka St. Xavier’s College u Fr. Agustine Sunny, ki kmie ki kpa, ki khynnah skul, bad kiwei kiwei ki heh ophisar sorkar.
Ha kane ka sngi la pynkup burom ïa ki samla pule kiba pas bha bad ïoh ïa ki mark kiba heh ha ki subjek bapher bapher ha ki eksam ba la pynlong da ka skulbah North Eastern Hill University (NEHU).