Rung jubor ki mynder Bangladeshi ha Rongdongai, shah dung uwei, kem ki Pulit saw ngut

Shillong, Nailar, 09: Saw ngut ki runar ba la suba ba ki dei ki mynder ri na ka ri Bangladesh ki la shah kem ha ki shipai Border Security Force (BSF) ha ka sngi Saitjaiñ ryngkat ka jingïatreilang bad ki Pulit ka South West Khasi Hills District kynthup ki paidbah hadien ba ki la rung jubor ha ka shnong Rongdongai bad dung pynmynsaw ïa uwei u nongshong shnong.
U Superintendent of Police ka South West Khasi Hills District Bah B. Jyrwa ha u kyrwoh u la pyntip ba ha ka sngi Thohdieng ha ka por kumba 1:00 baje mynstep 8-9 ngut ki runar bym lah ban tip ki la rung jubor ha ka iing sah jong u Balsrang A. Marak, 21 snem ka rta ha ka Rongdangai, katba u dang ïoh thiah ha ka dukan jong ka Lakme A Marak.
Na ka met jong ki saw ngut, ki Pulit bad ki shipai BSF ki la ïoh kurup kawei ka Mask, ki lut pisa ka ri Bangladesh, uwei u hetkheri, ar tylli ki mobile phone, ar tylli ki jacket bullet proof, lai tylli ki Walkie Talkie Handset, ki bek thep pisa barit, uwei u sdie, kawei ka khanshi khap sainar, lai tylli ki Screwdriver bad uwei u Spanner.
“Ki runar ki la rung shapoh ka iing bad pynap ïa u da ka pistol na khlieh bad pan ïa u phone number jong ka trai dukan. Hadien kata, ynda ki la teh hetkheri ïa u Balsrang Marak ki la rahbor ïa u sha ka shnong New Rongdangai,” la ïathuh u SP.
“Ki runar ki la ïasylla ban shu ot ïa u ryndang da kaba pynïap ïa u (Balsrang). Hynrei, katba dang ïaid, sa kumba 6-7 ngut ki runar ki la ïaid suki suki nadien bad haba ïohi ïa kane ka jingbym shngaiñ ka jingim lajong, suki suki u (Balsrang) loit ïa ka jaiñ (Gamcha) ba la teh ïa ki kti jong u bad phet bak ban leit rung sha kawei ka ing ha ka shnong New Rongdangai bad khang ïalade shapoh hynrei ki runar kiba la kthong ïa u, ki la kyndar ïa ka jingkhang nabar bad siar katto katne kuli,” la ïathuh shuh shuh u SP.
U SP u la pyntip ba ki briew kiba don hapoh ka iing (ba la rung u Balsrang) ki la sheptieng her bad da ka jingbym banse ki la plie ïa ka jingkhang. “Ynda ki runar ki la ïoh rung shapoh iing ki la tangon ïa u Balsrang Marak bad ha kata ka por ki la sei ïa u hetkheri bad ong ïa kiba don hapoh ka ïing ba kin ïalam ïa u ban leit sumar,” u SP u la ïathuh.
U la pyntip ba ha ka sngi Saitjaiñ ha ka por kumba 2:15 baje noh sngi, ki Pulit ki la ïoh jingtip na uwei u rangbah, ba kajuh ka kynhun runar (ba la suba ba ki dei ki mynder ri Bangladeshi) ki la rung jubor ha ka jaka jong u hajan Khonjoy.
Mar mar la bthah ïa u Officer Incharge ka Nonghyllam ban leit ai jingïarap.
“Tang shu poi ha ka jaka ba la pyntip, ki runar kiba don kumba 8-9 ngut ki la sdang ban phet sakma. U OC bad ka kynhun Pulit ki la hukum ban ym phet bad siat pyntieng ruh ar kuli sha suiñ. Hynrei ki runar kim shym la sngap satia hynrei ki la phet ïap phet im sha khlaw. Ka kynhun Pulit ba la ïalam da u OC ka la lap ruh ba kane ka kynhun runar ka la rah ïa ki tiar siat barit,” la pyntip u SP.
Ha ka jingkthong jong ki Pulit ryngkat ki BSF bad ki paidbah la ïohkem ïa ki saw ngut kiba donkti katba saw ngut kiwei pat ki la lait phet. Ki Pulit bad ki shipai BSF ki dang pynlong ïa ka jingthwet kaba jur ban ïohkem sa ïa ki saw ngut ki runar mynder Bangladeshi kiba la leit phet.
Ha kaba ïa dei bad kane ka jingjia, u SP u la pyntip ba kine ki runar ki lah ban dei na ka kynhun kaba don jingïadei bad ki Pulit ka ri Bangladesh bad kane ka jingsuba ka mih hadien ka jingïoh kurup ïa kawei ka Identity Card jong uwei u Pulit ka Bangladesh na kane ka jaka ba shah shoh u Balsrang A Marak ha shnong Rangdongai.
Ïa ki saw ngut ki mynder Bangladeshi kiba la shah kem shimti noh da ki Pulit ka South West Khasi Hills District katba ïa ki saw ngut kiba la lait phet, ki shipai BSF bad ki Pulit ki dang pynlong ïa ka jingthwet kaba jur ban ïohkem ïa ki shwa ban jam sha u pud u sam jong ka ri Bangladesh.