Pynksan u CM ïa ka jingpynïasoh ki MLA Congress sha ka NPP, kyntait ïa ka jingshah kynnoh khwai

By Mawphor Editor On Aug 10, 2025

Shillong, Nailar, 07: U Myntri Rangbah ka Jylla u Conrad K Sangma u la pynksan ïa ka jingpynïasoh jong ki MLA ka Congress sha ka National People’s Party (NPP) da kaba kyntait ruh ïa ka jingkynnoh ba ka NPP ka ‘khwai’ bad ka ‘pynbiej’ ïa ki MLA
Katkum ka jingong jong u, ki MLA ki la pynïasoh sha ka NPP ban ïoh ïa ka roi ka par ha ki Constituency jong ki.
Ha ka jingïakren bad ki lad pathai khubor dang shen ha ka sngi Palei, u Sangma, u la ong ba dei ki MLA ka Congress kiba la wan pynsngew ha u ban pan ïa ki song pynroi, ïa kaba u la kular ban pynurlong katkum ka jingkwah jong ki.
U la pynshai ba kam shym la don kano kano ka kyndon halor ka jingpynïasoh jong ki sha ka NPP bad u la ïaiban ba ka roi ka par bad ka jingshaniah ki dei ki thong kiba hakhmat eh jong ka NPP.
U Myntri Rangbah shuh shuh u la ong ba ka jingpynrung dkhot ïa ki MLA ka Congress sha ka NPP ka long katkum ki kyndon jong ka Bynrap Bashiphew jong ka riti synshar ka ri India.
“Baroh kiba la wan pynïasoh ki la bud ïa ki rukom treikam bad dei na kata ka daw ba u Lamphang jong ka Iingdorbar Thawaiñ hadien ba u la ïohi ïa ki kyndon bad u la sngewhun ïa ka rukom treikam bad u la ai ïa ka jingmynjur jong u,” u la ong.
“Phim lah ban ong tang namarba ka jingpynïasoh ka la jia ba ka dei ka jingpynkhein ïa ka aiñ, em, ka aiñ ka ong ba phi lah ban leh ïa kata tangba phi don ïa kane bad phim lah ban leh ïa kata, lada phim don ïa kane. Kumta lada ngim don ïa ka, ngim lah ban pynïasoh, kim lah ban buh ïa kano kano ka jingkylli namarba ïa ka jingpynïasoh la leh katkum ki kyndon jong ka Bynrap Bashiphew jong ka Anti-Defection Law,” u la ong.
U Myntri Rangbah u la pynpaw ruh ïa ka jingsngewkhia halor ka jingbym sngewhun hapoh ka NPP da kaba kam ba ka jingïapher bad jingsngewkhia ka ju don beit ha kano kano ka seng.
U la pynskhem ba ka donkam ka jingïatreilang, ka jinglah bad ka jinglong nongïalam ha kaba weng ïa kine ki jingeh bad ban pynroi ïa ka jingïatylli hapoh ka seng.
“…kin don beit ki jingsngewkhia, kin don beit ki jingeh hynrei ki nongïalam ki dei ban ïatreilang bad ki paidbah, bad ban pyrshang katba lah ban weng ïa ki jingeh bad nga pyrkhat ba kata ka dei u shabi ïa ka party ne ka Sorkar ne kino kino ki seng shimet ne ki riewshimet ban ïakhun ïa ki jingshah tynjuh bad kata ka dei ka rukom ruh kaba phi dei ban trei,” la bynrap u Sangma.