Bun ki dukan ba lehsih bad pynkheiñ kyndon, lap ki 2 seng ha ka jingkhynra ïa ki dukan ha Nongpoh

Nongpoh, Nailar 09: Hadien ka jingujor na ki paidbah halor ka jingdon ki dukan die marbam kum ki ja, dhaba bad kiwei ki jaka bam kiba khlem bud ïa ki kyndon jong ka Food and Safety, mynta ka sngi ka kynhun jong ka Ri Bhoi Youth Development and Social Organization (RBYDSO) bad ka Meghalaya People Social Organization (MPSO) ka la pynlong ka jingkhynra ïa ki dukan ha Nongpoh bad ha rud surok bah National Highway 06.
Kane ka jingleit jurip ka la long hadien ba la ioh jingbit na ka tnad Food and Safety bad na ki bor pulit ka Ri Bhoi.
Ha kane ka jingkhynra, la lap shai kdar ba don bun ki dukan kiba pynkheiñ ïa ki kyndon aiñ, kaba buh jingma ïa ka koit ka khiah jong ki nongbam. La shem ruh ba don ki marbam kiba la kut tarik (expired) bad kiwei pat kiba bym long shngaiñ shuh ban bam.
U General Secretary ka RBYDSO, Bah Kerbok Malai, u la ong ba ka seng ka shim ïa kane ka sienjam namar ka jingsngewkhia halor ka rukom die ïaki marbam ha Nongpoh, ha kaba bun ki dukan kim leh khuid bad kim bud ïa ki kyndon ban pynshngaiñ ïa ki nongbam. U la pynpaw ruh ba kane ka jingkhynra ka long hadien ba ka seng ka la ioh jingujor na ki paidbah kiba dawa ban pynlong ka jingjurip ban tip la ki dukan ki don license bad ki lehkhuid ne em haba ki ai sha ki paidbah.
Hadien ba lap ïa ki dukan kiba pynkheiñ kyndon, ka RBYDSO bad MPSO ki la ujor syndon ha Nongpoh Police Station bad ruh sha ki bor jong ka Food and Safety ban shimkhia halor katei ka bynta bad ban ïaid katkum ki kyndon jong ka aiñ.