Shillong, Nailar 09 : Ka jingïalam sam khusnam sha ki samla ba pass bha ba la pynlong da ka National People’s Youth Front Shillong City kaba long ha ka sngi Saitjaiñ ha Shillong ka la pynkyndit lut namar ki don bun bha ki samla pule kiba ïoh palat ïa ka 90 persen la ka long ha ka klas 10 bad kumjuh ha ka klas 12.
Kane ka jingsam khusnam kadei tang ïa kito ki khun samla kiba dei na ki constituency jong ka Shillong City ha kaba la shim beit tang ïa kiba ïoh 80 persen sha jrong ha ka klas 10 bad klas 12. Ha kane ka sngi ki la don palat 70 ngut ki samla kiba la ïoh pdiang ïa kane ka khusnam.
La donlang ha kane ka sngi naduh ka MLA jong ka NPP na Shillong East bad Myntri ka Sorkar Jylla Kong Ampareen Lyngdoh kum ka Kongsan nangta u Working President ka party Bah Hamlet Dohling kum u Symbud Kongsan bad ruh u Nongai ktien ka party Bah HM Shangpliang nalor ki nongïalam ka NPYF bad kiwei kiwei.
Da kaba ïaroh ïa ka jingaiti lut jong ki met ban mynsiem ban kot haduh kattei persen ki mark, ka Myntri ka la ong ruh ba dei tang kito kiba trei shitom kiba lah shisha ban poi sha ka thong ha ka jingim. Ha kajuh ka por ka la kyntu ruh ïa ki samla pule bakin long kiba peitngor na ka jingshah pynngop ha ki shangkhawiah jong u drok.
Ha kane ka sngi ka Kong Ampareen ka la pynbna ruh ban ai ïa ka song pisa kaba kyrpang sha ki samla kiba wan hakhmat eh ha ka eksam klas 10 bad ruh ha ka klas 12.
Katba na ka liang u Bah Hamlet Dohling u la ong ba ha kane ka juk watla ki don bun bha ki samla pule kiba pass bha hynrei ki don duna pat ki samla kiba ïoh ban bat ïa ki kam kiba heh ha ka sorkar. Hynrei u ong pat ba dei ha kine ki khyndiat snem ba u la ïohi ba ki samla pule ka jylla ki la kham kiew da kaba peit na ka jingpass bha ha ki eksam kaba long ka jingkyrmen ïa ka jylla.
Na ka liang ka Kongsan bad Symbud Kongsan ki la ai ruh ka jingïaroh ïa ka NPYF kaba la shim ïa ka bynta kaba khraw bha ban pynlong ïa kum kitei ki prokram kiban ai mynsiem shuh shuh ïa ki samla pule ba kin leh bha ha ki jingpule nangne shakhmat.
Shwa kane la ïoh ruh ka jingkren na u President jong ka NPYF Shillong City Bah M Rapthap ha ryngkat ka jingdonlang ki nongïalam ba hakhmat jong ka NPYF central body.
Ha kane ka jingïalang la donlang ruh ki kmie ki kpa kiba wan ban synran lang ia ki khun ki kti ban pdiang ïa ka khusnam na ka NPYF.
Lah ban kdew kane kadei ka sien kaba nyngkong ba ka NPYF ka la shim ïa ka sienjam ban ithuh ïa ki khun samla kiba pass bha ha ki eksam. Mynta kum ka kynhun ki samla jong ka NPP ka la dep ban pynlong bun tylli ki distrik ïa kane ka jingpynkup burom bad ka la pyntip ruh ba kan ïai bteng nangne shakhmat.
