Pynlong ‘Cleaning Drive’ ka Jowai Presbytery, Jowai ban wanrah ïa ka khuid ka suba

Jowai, Nailar 09: Ka Socio & Economic Life Development jong ka Jowai Presbytery, Jowai mynta ka sngi Saitjaiñ 9 tarik u Nailar, 2025 kala pynlong daka jingpynkhuid (Cleaning Drive) naduh ka por 9 baje mynstep ïa ki bynta rud surok naduh Stand War shaduh ka jingkieng Riatsasim By-Pass Jowai.
Ïa kane ka prokram la leh hapoh ka Chief Minister Youth Development Scheme Committee Jowai (CMYDSCJ), hashwa kane la don ka jingïalang ba lyngkot bala pynïaid da u Chairman Rev. K. Dkhar uba la ai ruh ki kyntien pdiang sngewbha sha baroh ki nongwan ïashim bynta na ki Jingïaseng Samla Balang bapher bapher kiba hap hapoh ki 3 tylli ki Jingïaseng District kata (Jowai, Thadlaboh bad Mustem).
Katba na ka liang u ma P. Lyngdoh uba dei ruh u Chairman ka Jowai Municipal Board (JMB), ula ai ka jingkren lyngkot halor ka jingkhuid jingsuba bad ula kyntu jur ban don ka jingkitkhlieh na ka bynta ka jingitynnad ka mei mariang bad kumjuh ruh ïa ki sawdong sawkun, la ïoh ruh ka jingduwai na u Moderator ka Jowai Presbytery TBn. O. Hua.
Baroh ki dkhot (Volunteer) kila wan shitrhem ban ïashim bynta ha kane ka jingpynkhuid ki kynthup naduh ki samla kynthei, ki samla shynrang, ki dkhot nongkitkam jong ki Jingïaseng Samla, ki Pastor lem bad kiwei de ki riew rangbah kiba la pynkhuid ïa ki ñiut ki ner naduh ki platic, ki klong um bad kiwei de ki jakhlia ban pynlum pynlang shi jaka, khnang ba ka tnad Municipal kan ïoh ban leit pynlum pynlang ïa ki.
Ka Socio & Economic Life Development jong ka Jowai Presbytery, Jowai kala shim ïa kane ka lad kum ka jingpynkhreh Independence Day, na ka bynta ban wanrah ïa ka jingbha jingmiat haka imlang ka sahlang bad ka jingïadon bynta lang ban wanrah ïa ka jingkhuid jingsuba, na ka liang ka Jowai Presbytery lyngba kane ka tnad kan dang bteng biang ban shim ïa kum kine ki lad jingïada ïa ka mariang.