PARIS, Nailar 09: Ha kiba bun ki bynta jong ka spah snem kaba 21 (21st century), ïa ka Ballon d’Or la synshar da arngut ki khlur ïalehkai phutbol ba kynsai: U Lionel Messi bad u Cristiano Ronaldo. Hapdeng jong ki, ki la khur 13 tylli ïa kine ki khusnam, ha kaba u Messi u la ïoh 8 tylli, katba u Ronaldo 5 tylli.
Hynrei haba la pynbna ïa ki kyrteng kiba la shah jied na ka bynta ka Ballon d’Or 2025 ha ka sngi Palei, baroh ar tylli ki kyrteng jong kine ki khlur ïalehkai phutbol ba kynsai kim shym la don satia. Kane ka dei ka snem kaba ar ba kine ki ar ngut kim shym la paw kyrteng.
U Messi ula shah jied khatduh eh ha ka thup ba lyngkot (nominee) na ka bynta ka khusnam Ballon d’Or dei ha u snem 2023. U la ïaid shakhmat ban khur ïa katei ka khusnam ha utei u snem, hadien ba u la ïarap ïa ka Argentina ban rah ïa ka FIFA World Cup ha u snem shuwa ban sam ïa ka khusnam (Ballon d’Or). Hynrei u khlem la paw kyrteng ha ka thup ba lyngkot jong ki 30 ngut ha u snem 2022.
Ha kawei pat ka liang, u Ronaldo u la paw kyrteng khatduh ha ka thup ba lyngkot dei ha u snem 2022 ha kaba u la wan ha ka kyrdan ba 20 ha ka thup jong ki 30 ngut ki rangïalehkai ba la pynbna, ka kyrdan kaba poh tam na ka bynta u Roanaldo naduh u snem 2005.
Ka por ba khatduh ba u Messi bad u Ronaldo ki paw kyrteng ryngkat ha ka thup ba lyngkot na ka bynta ka khusnam Ballon d’Or kadei ha u snem 2021. U Messi u la khur ïa ka Ballon d’Or ha katei ka snem, katba u Ronaldo u la wan ha ka kyrdan ba hynriew.
Ka jingmih nyngkong jong ki ar ngut ryngkat ha ka thup kyrteng ka dei ha u snem 2007 ha kaba u Ronaldo u wan ha ka kyrdan ba ar bad u Messi, u wan ha ka kyrdan ba lai.
