Nongpoh, Nailar, 08: Ka Zynmed Pharmaceuticals, kawei na ki kompani pynmih dawai, mynta ka sngi ka la pynbna ba kan sa sdang noh shen ban ai ka jingshakri ha ka thaiñ Shatei Lam Mihngi. Ka thong jong ka dei ban pynpoi ïa ki dawai dashin haduh thliew iing ki paidbah, khnang ba kim donkam shuh ban leit thied sha ki dukan dawai. Kine ki dawai yn sa pynpoi da ki briew ba la buh kyrpang ban leit haduh iing ki nongshong shnong haka dor kaba kham duna haba nujor bad kiwei pat ki jait dawai.
Ban pynbna paidbah ïa kane ka jingthmu, ka kompani ka la pynlong ka jingïalang bad ki nongthoh khubor ha Guwahati. Ha kane ka jingïalang, ki khubor ki la pynpaw ba tang hapoh ki bnai khyndiat ban wan, yn sa pyllait paidbah noh ïa ki dawai bad pynithuh ïa ki rukom treikam jong ka kompani ha ka thaiñ Shatei Lam Mihngi.
Ha ka jingkren jong ki nongïalam ka kompani, kaba kynthup ïa ka Aishi Ghosh Dastidar kaba dei ka nongthaw jong ka Zynmed Pharmaceuticals bad ka Kabita Sarma Baruah, Director North East India, lem bad ar ngut ki nongmihkhmat na Meghalaya, u Bah Arban Sutnga bad u Bah Lambha Kurbah, ki la ong ba ka thong jong ka kompani ka long ban wanrah ka jingkylla ha ka koit ka khiah, khamtam ban ïarap ïa ki longïing ba duk bad ba rangli, namar ki dawai jong ka Zynmed ki kham duna dor lada nujor bad kiwei, bad yn pynmih ruh ïa ki dawai kiba lah ban sumar ïa ki briew bad kumjuh ruh ki jait dawai ba sumar ruh ïa ki mrad.
Ki la ong ruh ba kane jingpynbna paidbah (Pre-Launch) ka long ban pyntip sha ki paidbah bad lyngba kane ka jingpynbna kum ka kompani ka don ïa ka thong ban wanrah ka jingkylla ha kaba ïadei bad ka jingpynpoi bad ban pynbiang ïa ki dawai dashin, khamtam ba ki paidbah kim dei shuh ban khuslai wat haka por ba donkam kyrkieh kumba la bthah da ki doctor.
