Nongpoh, Nailar 06 : Ka kurim jong u Bah Dlas Shadap, u rangbah ba mynsaw jur na ka jingshah bom pynmynsaw ha ka 26tarik Naitung, ha ka sngi Balang ka la kynnoh ba dei ka kmie bad u hynmen jong ka kiba donkti ha katei ka kam.
Haba kren sha ki nongthoh khubor mynta ka sngi, ka kurim jong u Bah Dlas ka la ïathuh ba ka don hapeng ka jingshongsyier ryngkat 6 ngut ki khun namar ka jingshah byrngem ha ka kmie bad ha u hymmen halor katei ka jingshah bom shah shoh u kurim jongka uba la mynsaw jur.
Ka la kynnoh ba kam banse ban phla noh halor katei ka jingjia ba dei ka kmie jong ka bad u hymmen jongka, kiba la bom la shoh ïa u kurim jongka, haduh ba u la mynsaw jur. Ka ong ruh ba ha katei ka sngi kam shym la nud ban phla ïa katei ka jingjia, na ka daw ba ka kmie bad u hymmen ki la byrngem ïa ka ba kam dei satia ban ïathuh briew.
Halor katei ka jingjia, ka la ïathuh ruh ba mynta ka hap ban sah sha ki iing ki sem jong ki briew bad kam nud shuh ban leit sah sha la iing, ba ka la shah byrngem bad mynta wat ki para shnong ruh ki la kyntait ban ai jaka sah na ka daw ka jingshah byngem. Ka la kyrpad ruh ïa ki bor ka ain ba dei ba kem noh ïa ka kmie bad u hymmen jongka, kiba la don kti ha katei ka kam runar ban bom ban shoh ïa u hynmen jongka.
Na ka liang u Rangbah Shnong, Bah Batskhem Sohtun u la pynpaw ka jingsngewkhia ba ma u ruh u la shah byrngem lang bad kumta u la ong ba la donkam ba ki bor ka ain kin kem noh kham kloi ïa kitei kiba donkti ban bom ban shoh ïa u bah Dlas Shadap.
Ha kajuh ka por u Bah Plas Shadap uba dei u para trai jong u Bah Dlas u la pynpaw ka jingsngewkhia kaba jur halor ka jingsuki ki bor pulit ban kem ïa kiba donkti ha katei ka kam pynmynsaw. La ïathuh ruh ba mynta ka sngi ruh ki la ujor sa sha u SP ka Ri Bhoi ban dawa kem mardor ïa kitei kiba donkti ha katei ka kam kaba la wanrah ïa ka jingshong syier wat ha shnong ha thaw.
