Leit ïakynduh u CEM ka KHADC ïa u Dy.CM kyrpad ban pyllait noh ïa ka bhah ka Council

Shillong, Nailar 06 : U CEM ka KHADC Bah Shemborlang Rynjah ryngkat u Executive Member ka tnad Finance, Bah Seibor Warbah ha ka sngi Balang ki la kynduh ïa u Symbud Myntri Rangbah ka Jylla, Bah Prestone Tynsong ban phah tuklar lang na ka bynta ban pyllait noh ïa ka bhah ba ka Council kadei ban ïoh.
Haba kren bad ki lad pathai khubor hadien ka jingïalang, u CEM u la kynnoh ba ka la don ka jingpynslem na ka liang ka sorkar ban pyllait ïa ka bhah sha ka KHADC katba kiwei pat ki District Council ki la dep ïoh pdiang ïa ka bhah.
“Ngi la dep ban buddien lyngba ki shithi ha kine ki khyndiat bnai ba la dep hynrei haduh mynta ngim pat ïoh pdiang ïa ka bhah jongngi. Kumta, ngi sngew ba la donkam ban kynduh markhmat ïa u Symbud Myntri Rangbah halor kane ka ishu,” u la ïathuh.
Haba jubab halor ka jingkylli, u CEM u la ong ruh ba na ka liang u Symbud Myntri Rangbah u la bthah ïa u Ophisar ba dei peit ban leh ïa kaba donkam.
Shuh shuh u la pyntip ruh ba ki la kyrpad ïa ka jingkyrshan jong ka sorkar jylla na ka bynta ban pynlong kham bun ki jingwad bniah kiba ïadei bad ka Jaidbynriew Khasi.