Da ka surok thymmai ba 200 klur na Weiloi – Keniong kular u CM ha ka Sur Paidbah SWKH

Shillong, Nailar 06 : Ka Kynhun Sur Paidbah South West Khasi Hills District hapoh ka jingïalam jong u Chairman Bah Kitborlang Nongrem ka la kyrpad ïa u Myntri Rangbah ban pynstet noh ïa ka jingpyntrei ïa ka surok thymmai (Intermediate lane) naduh Weiloi ter ter sha Mawkyrwat haduh Keniong, South West Khasi Hills.
Ha kane ka jingleit, la donlang ruh u MLA ka Mawkyrwat Bah Renikton L Tongkhar kumjuh u MLA ka Ranikor Bah Pius Marwein nalor kiwei kiwei ki riewrangbah na ka thaiñ.
Na ka liang u Chairman ka Sur Paidbah haba kren bad ki lad pathai khubor u la ong, “Ngi sngewkmen ban pyntip sha ki paidbah ba u Myntri Rangbah u la pynshai ba ïa kane ka surok kumba la kren mynshwa la dep mang haduh 200 klur naduh Weiloi haduh Keniong.”
U Bah Kitborlang Nongrem u la ong ruh ba kane ka long ka khubor kaba sngewtynnad bad kaba kmen kaba ki paidbah ka thaiñ South West Khasi Hills baroh kawei ki la ap khmih lynti la slem bha ïa kane ka surok kaba donkam tam na ka bynta ka distrik baroh kawei.
“Lyngba ka jingïatrei lang jong baroh ki paidbah ka distrik baroh kawei khlem da ïa ñiew la ngi wan na kano kano ka kynhun ne na ki political party ne sengbhalang bapher bapher ngi na South West Khasi Hills hi shisien haba kren ïa ka roi ka pa bad ka jingmyntoi jong ka South West ngi wan lang khrui beit kumne,” u la ong.
Ha kajuh ka por, ka kynhun ka la pynpaw ka jingsngewnguh ïa u Myntri Rangbah kumjuh ïa Symbud Myntri Rangbah kiba la shimkhia ïa kane ka projek kaba kongsan tam na ka bynta ka distrik hi baroh kawei.
Na ka liang ki arngut ki MLA kiba donlang ha katei ka jingïakynduh ïa u Myntri Rangbah ki la pynpaw lang ïa ka jingsngewkmen halor katei ka khubor kaba ki ïoh na u Myntri Rangbah.
U Bah Renikton u la ïathuh ba ka jingshna ïa kane ka surok na Weiloi sha Keniong kadei kaba la mang pisa na ka World Bank bad kadei ruh kaba la buh thong ban pynpoi shaduh Ranikor da kaba sdang shwa ha ka kylla kaba nyngkong tang na Weiloi ha Keniong. Katba ha ka kylla kaba ar pat kin pynpoi haduh Ranikor.
U Bah Pius pat u la ïathuh ba kane ka surok kan pynïasoh lang ïa katei ka thain wat shaduh ki bynta jong ka South West Garo Hills nalor ba kan pynmyntoi bun bha ïa ki paidbah ba sah ha ki khappud.
Shuh shuh u ong ruh ba mynta ki khmih lynti noh ba ka sorkar kan khot tender noh khnang ba ka kam kan ïaid stet.
Katkum ka jingong jong u, ki la buddien ruh wat ïa ka surok kaba pynïasoh ïa ka Mawsynram sha Ranikor bad Wahkaji sha Ranikor ruh ha kaba la pyntip ba na ka liang ka sorkar ka la kren ïa kane ka kam bad ka sorkar pdeng.