Shillong, Nailar 06: Ka Mawlynrei SC ka la ïohrung sha ka final jong ka lympung U-20 Fourth Division Football League 2025 ba la pynïaid da ka Shillong Sports Association ha madan First Ground-SSA Stadium, Polo. Kane ka dei hadien ba ka la pynliem noh da 1-0 kol ïa ka Lapalang SC ha ka jingïakhun semifinal kaba nyngkong hynne ka sngi Balang.
ïa ka namtam la thep da u Kerryland Mawlong ha ka minit kaba 16 jong ka kylla step na ka bynta ka Mawlynrei.
Watla ka Lapalang ka la shah pynduna sha ka 10 ngut ki rangïalehkai hadien ba ïoh red card uwei hashwa ban kut ka kylla step hynrei ka Mawlynrei kam shym la lah ban shim kabu ban dang pynkhihjar shuh ha kaba ka kol ka la neh kumjuh da 1-0 haduh ban da kut ka 80 minit ba la mang.
Ban shu pynkynmaw, baroh saw tylli ki kynhun kiba la poi sha ka wat ïakhun semi final ki la thikna ban kiew kyrdan sha ka lympung ïalehkai Third Division Football League ha ka samoi ban wan. Kumta ka jingjop ïa ka Mawlynrei kan long lad ban rah ïa ka nam lahduh ha ka Fourth Division 2025 shuwa ban ïakhun ha ka Third Division ha ka samoi ban wan.
Ka Semifinal kaba ar kan long ha kane ka sngi Palei hapdeng ka Mawkasiang SC bad ka Lummawbah SC ha ka por 2 shiteng noh phaisngi.
