Shillong, Nailar 5 : U Nongïalam ka Trinamool Congress (TMC) ha kane ka jylla uba long ruh u Nongïalam ka Liang Pyrshah bad Myntri Rangbah ba mynshwa ka jylla u Dr Mukul Sangma u la ai dak ba kane ka party ka lah ban poi sha u pud ban khylliap lama noh ha kane ka jylla namar katba nangïaid ki por ka la nang duh nang duh ïa ka jingkyrshan na ki paidbah.
Ka TMC kaba la wan suhthied ha kane ka jylla da ka jingphuh jingphieng ha shwa ban kut u snem 2021 ha kaba 12 ngut ki MLA ka Congress ryngkat bad u Dr Mukul ki la pynïasoh sha kane ka party hynrei mynta ka la nang duh lyer bad ym i dak shuh ban dang pynkhlaiñ ïa ka ruh bad wat u Dr Mukul ula ong ba ka party kam lah ban bat ne pynneh ïa ka lyer ban ïoh ka jingkyrshan bapura na ki paidbah.
Ha ka jingïakren bad u nongthoh khubor u Dr Mukul u la ong “ Ngam ong ba ka dei ka jingkut, hynrei nga shu ïathuh ïa kaei kaba jia ha madan namar ha kaba kut hi ka dei ka mon, ka jingthrang bad jingangnud bad ka sur u paidbah uba nga shakri namar dei ma ki kiba ai mynsiem ïa nga ban trei bad ïai shakri ïa ki”.
U la ong ym lah ban len ha ka por ba seng nongrim ïa ka ha kane ka jylla ka la ïoh ka jingkyrshan na ki paidbah hynrei katba nang ïaid ki por la nang kylla namar kawei ruh ka jur palat ka jingïakynad napoh napoh. “ Ha kaba sdang ka party ka la ïoh ïa ka jingkyrshan na ki paidbah hynrei sngewsih ba ngim lah ban pynneh ïa kane ka lyer. Ki kam pohïing bad ka jingbym don ka jingïohi jngai ka la pynmong ïa ngi. Don ki paralok jong nga na ka thaiñ mihngi kiba ym kwah ban pynpaw ba nga dei u kyrtong CM jongka party namar ki sheptieng ïoh ki paidbah kim pdiang nalor ba ka dei ka party ba thymmai bad sa u kyrtong myntri rangbah ruh da u Garo” ong u Myntri Rangbah ba rim ka jylla.
Ka TMC ka la wan phrung khlieh ha kane ka jylla ha u Naiwieng 2021 dakaba ka la khring ïa ki 12 ngut ki MLA ka Congress ba kynthup ïa u Dr Mukul, Lamphang ba rim bah Charles Pyngrope. Une u jumai saiñ pyrthei u la ktah jur ïa ka Congress naduh katei hi ka por kat haduh mynta hi. Ka don ka jingkhmih lynti ba ka TMC kan wan ha ka bor lem bad kiwei kiwei ki party namar ka dei ka National Party kum ka BJP bad NPP hi. Hynrei kane ka jingkhmih lynti kam shym la urlong namar ka TMC ka khlem jop kumba ka mutdur ban jop namar ha ka election MLA 2023 ka la jop tang san ngut ki MLA saw na Garo Hills bad uwei na Khasi Hills uba dei u bah Charles Pyngrope dakaba hiar arsut na kaei kaba la don lypa ki MLA kiba don haduh 12 ngut.
Hadien kane ym i don shuh kano kano ka jingkhohreh ban pynkhlaiñ ïa ka TMC. “ Ka long kaba eh ban pynïaid shakhmat namar ym shym la ïoh ka jingkyrshan ha baroh kawei ka jylla” ong u Dr Mukul.
Um pat kren shai la un khylliap lama noh ïa ka TMC hangne ha jylla hynrei u la ai dak ba lada u pynïasoh sha kano kano ka party kan long da ka jingïamynjur bad kat kum ka sur jong ki paidbah. “ Ka jingpynïasoh sha kano kano ka party ka lah ban jia hynrei ka jingshakri ïa ki paidbah kan ïaineh shirta khlem kano kano ka jingkylla bad kane ka dei kaba ngan ïai pynneh junom” ong u Dr Mukul.
