Nongpoh, Nailar, 05: Ki nongïalam shnong ka Ri-Bhoi District hapoh ka lama jong ka Synjuk ki Rangbah Shnong, Ri-Bhoi District ha ka sngi Baar ki la lum da ka jingïalang ba kyrkieh namar ka jingsyrtok jong ki paidbah ha kaba ïadei bad ka jing bym thikna jong ka bording elektrik ha ka district baroh kawei khamtam sha ki thaiñ nongkyndong.
Ha ka jingïakynduh la sakhi lang da ki Rangbah Shnong ba kylleng ka RiBhoi District ban ïathir ïatai ha kaba ïadei bad ki jingeh ka dong Ri-Bhoi bad kawei na ki mat kaba hakhmat ka dei ka bording elektrik kaba ki paidbah ki la mad jingeh shisha ha kine ki sngi.
Haba kren sha ki lad pathai khubor na ka liang u Bah PB Sylliang General Secretary ha ka jingdonlang u Bah B.B Makdoh Chairman lem bad ka kynhun ki Rangbah Shnong u la ong ba kum ki nongïalam shnong ki dap da ka jingsngewkhia ha kaba ïadei bad ka jinglip bording khah khah hapoh ka district, bad kum ka kynhun ki Rangbah shnong ki la rai ban leit kynduh syndon ïa u Myntri ba dei peit ïa ka tnad bording bad kumjuh ruh ïa ki ophisar ban kyrpad ban pynbiang ïa ka bording kumba ki samla pule mynta ki la hap ban pynkhreh ïa ki eksam bapher bapher.
U la ong ruh ba kum ki nongshong shnong ka Ri-Bhoi ngi sngewrem ba ka jaka pynmih bording ka don ha Ri-Bhoi katba ka jinglip khah khah hap hi ban mad ki nongshong shnong ka Ri-Bhoi bad kane ka dei ka sien ba khatduh ba ka Synjuk kan leit kynduh myntri ha kaba ïadei bad katei ka mat bad lada kam urlong hapoh shi taiew kum ki Rangbah Shnong kin sa leit ban khang tala syndon ïa ka ophis ka tnad MeECL kaba don hapoh ka district.
Ha kajuh ka por na ka liang ki Rangbah Shnong da kawei ka sur ki la rai ban pyrshah beit ha kaba ïadei bad ka jingthmu ka sorkar ban pyndonkam ïa ki Smart Meter namar kumba la ïoh jingtip ba ki longiing ba pyndait ïa ki smart meter ka la wanrah pynban ka jingbabe namar ka jingkiew jong ka bai bording da ki hajar hajar bad namar dawa ruh ban pyntreikam bad ban sdang noh ïa ka 132 KV na ka bynta ka jingbit jingbiang ki paidbah ha kaba ïadei bad ka bording elektrik.
