Shillong, Nailar 5 : U National President ka National People’s Party (NPP) bad Myntri Rangbah ka Jylla Conrad K Sangma, ha ka sngi Ba-ar, ula pdiang sngewbha ïa ka jingwan pynïasoh u MLA ka Congress na Mylliem Bah Ronnie V Lyngdoh, sha ka sem jong ka NPP.
ïa u Bah Ronnie ryngkat ki nongkitkam bad ki nongkyrshan, la pdiang sngewbha ha ka jingïalang bala pynlong da ka NPP ha ka ïingsah u Myntri Rangbah ka Jylla kaba don ha Oakland, Shillong
Ha kane ka jingïalang la ïadonlang u President ka NPP Meghalaya bad Symbud Myntri Rangbah ka Jylla Bah Prestone Tynsong, u Lamphang ka ïingdorbar Thomas Sangma, ki Myntri Sorkar, ki MLA, u MLA barim ka Mylliem Bah Hamletson Dohlong, u State Treasurer ka NPP Bah Daniel Thangkhiew lem bad ki MDC ka seng NPP.
Ha ka taiew bala lah, u Bah Ronnie uba dei u MLA ba sah marwei jong ka Congress, ula mih noh na ka seng Congress, kaba la pynlong ïa kane ka seng saiñ pyrthei ba rim duh hapoh ka Ri India, ban jah kyrteng syndon hapoh ka ïingdorbar Thaw Aiñ ka Jylla ba mynta.
Lah ban kdew ba ka Congress kala jop 4 ngut ki MLA ha ka elekshon 2023 hynrei ha u 2024, lai ngut ki MLA kila phetseng bad leit pynïasoh ïalade sha ka NPP. Kine ki laingut ki dei u Dr Celestine Lyngdoh MLA ka Umsning, Bah Charles Marngar MLA ka Mawhati bad Bah Gabriel Wahlang MLA ka Nongstoin.
Ka sur kaba mih na kine ki 4ngut ki MLA ha ka jingleit pynïasoh sha ka NPP ka long ba ki ihun ïa ka jingtreikam jong ka Sorkar MDA ba ïalam da ka NPP bad kwah ban ïadon bynta lang ha ka jingwanrah ïa ka roi ka par ha Jylla.
Kumba long mynta, ka NPP kala don haduh 33 ngut ki MLA hapoh ka ïingdorbar Thaw Aiñ ka Jylla.
