Nongpoh, Nailar 05: Ka seng Ri-Bhoi People’s Council hapoh ka jingïalam u samla Jayson Lennox Nongrum mynta ka sngi ka la leit ban aiti syndon da ka dorkhas sha u Deputy Commissioner ka Ri-Bhoi District hadien ba na ka liang ka seng hynnin ka sngi ka la kynnoh ba katei ka Night Club ka dei kaba la shu pynïaid beaiñ ha Queen’s Hotel bad kam ïahap satia bad ka NOC ba pan na ka Dorbar Shnong Mawsmai, namar kumba la ïoh jingtip ka don ruh ka jingkhalai beaiñ kaba ïaid shapoh jong katei ka Hotel kum ka Rummy bad ka Poker.
Haba kren sha ki lad pathai khubor na ka liang u Bah Jayson Lennox Nongrum u la ong ba hadien ka jingïoh ban ïakynduh bad u DC ka RI-Bhoi wat hapdeng ka jingbunkam jong u, ka la dawa ba ka bor district ka dei ban pynlong ka jingtohkit kaba khuid halor ka jingpynïaid ïa katei ka Night Club, namar kum ka seng hi kam lah ban pdiang ïa ki kam beaiñ ban pynlong hapoh ka district kumba wat na ka liang u MLA u la dawa shisngi shuwa ban plie ïa katei ka Club.
U la ïathuh ruh ba na ka liang u DC u la pyntip ba ka jingtohkit mynta ka dang ïaid shakhmat bad ha ka juh ka por na ka liang ka seng ka la dawa na ka Dorbar Shnong Mawsmai ba kan pynshai ha kaba ïadei bad ka NOC bala ai, la ka ïahap ne em bad ki kam ba pynïaid hapoh katei ka Hotel bad lada kam ïahap ka shong ha ka dorbar shnong ban ïaid shakhmat bad ban leh ïa kaba donkam.
