Shillong, Nailar 04: U nongïalam ka seng NPP bad u Myntri ka sorkar jylla u Marcuise N Marak u la kyntait ïa ka hamsaïa ba ka sorkar jylla ka don jingthmu ban pynkylla ïa ka kynhun Myntri ne ka jingphiah ïa ki Myntri, ha kaba u la ong ba kane ka shong beit ha u Myntri Rangbah ka jylla u Conrad K Sangma ban shim ïa ka rai.
Na ka liang jong u Marak u la pynpaw ka jingmon laitluid ban trei ha kano kano ka tnat kaba u la shah bynshet bad ïoh ïa ka kam da kaba ong ba kane kadei ka jingangnud jong ka party.
“Ka shong ha u Myntri Rangbah bad kum u state working president ka party nga long uba kmen ban ïoh ne trei ha kano kano ka kam,” u la ong.
U Marak u la kam ruh ba um pat ïohsngew ïa kane ka jingthmu ban pynkylla ïa ki kam jong ki myntri naba ka thong jong u ka long ban pynleit jingmut ha ki jingïalang bad ki kam jong ka party.
Na ka liang jong u, u la ïathuh ba u la bunkam ha kane ka kynti bad ki kam jong ka seng bad u khlem tip eiei shaphang jong ka jingthmu ban bhah kam thymmai ïa ki myntri ha kane ka kynti kaba mynta.
Haba kylli halor ka jingïalang hapdeng u Myntri Rangbah bad ka kynhun ki MLA na Garo Hills, u Marak u la ong ba ki MLA ki la pynpaw ïa la ki jingdonkam bad kumjuh ruh ki jingpyntreikam ïa ki skhim.
U la kren ruh da kaba shai ba kane ka jingïalang kam dei kaba la ïakren halor ka kam bhah myntri.
U la ong ruh ba kane ka jingïalang ka long ban pyndep ïa ki kam kiba ïadei bad ki kam pynroi ha kane ka jylla.
