Shillong Nailar 04: U Nongïalam ka NPP bad u Myntri ka sorkar jylla u Rakkam A Sangma u la pdiang sngewbha ïa ka jingwan pynïasoh jong u MLA barim ka seng Congress lna Mylliem u Bah Ronnie V Lyngdoh sha ka seng National People’s Party (NPP) bad ong ba kane ka jingwan pynïasoh jong u kan kyntiew ïa ka seng bad ki nongtrei jong ka.
Haba kren sha ki lad pathai khubor ha ka sngi nyngkong, u Sangma u la kyntait ba ka don ka jingthied da ka pisa kaba la khring ïa kiwei pat ki MLA ban pynïasoh sha ka NPP ne sha kiwei pat ki seng saiñ hima sima hynrei ka NPP ka donkam ïa ki briew kiba kwah ban wanrah ïa ka roi ka san ha ka jylla.
Na ka liang jong u, ula ong ba kane baroh kadei na ka jinglah jong u Myntri Rangbah ban trei ïa shibun ki kam pynroi ha ka jylla kaba la pynlong ruh ïa ki ban ïasoh sha ka seng NPP.
“Ka NPP ka khlem khring, hynrei ka ai mynsiem,” ong u Sangma da kaba bynrap, “Lada don mano mano kiba shah khring ne kiba ïoh mynsiem ym lah ban khang ia ki ban pynïasoh sha ka NPP,” u la ong.
“Kane ka jingwan pynïasoh da u MLA barim ka Congress ka long ka khubor kaba bha ïa ka seng,” ong u Sangma.
Haba kylli halor ka liang pyrshah u Sangma u la ong, “Ki don kumba 9 ngut ki dkhot ha ka liang pyrshah ba kynthup ïa 5 TMC bad 4 VPP bad ha kaba ïadei bad kane ngam lah ban ong eiei naba ki don shibun ki kam ha ka saiñ pyrthei. Ngi donkam ruh ïa ka liang pyrshah naba ki wanrah ïa ki jingmut ban tei ïa ki kam jong ka sorkar,” u la bynrap.
