Donkam ka jingïatylli hapdeng ki nongrep bad ki nongdie marrep ban lait na ka jingshah ot kilo

Shillong, Nailar 03: Kiba bun ngut ki nongrep kiba die ia ki marrep jong ki ha ïew dielang ki la pynpaw mynta ba ka donkam ïa ka jingïatylli hapdeng kiba die bad kumjuh ruh kiba thied ïa ki mar rep jong ki, khamtam kiba dei hi ki nongthied Khasi.
Dangshen ha ka jingleit jngoh jong ka KHADC hapoh ka jingïalam jong u CEM u Bah Shemborlang Rynjah bad ki EM ba kynthup ïa u Bah Powell Sohkhlet bad kiwei kiwei ki EM ki nongrep bad ki nongthied ki la pynpaw ïa ka jingangnud ïa ka jingdonkam ban don noh ïa ka jingïatylli hapdeng jong ki.
Kane ruh ka mih hadien ba ki la mat ïa ka jingshah ot kilo ïa ki marrep jong ki mynta la bun snem ha ki mahajon die jhur kiba dei ki bar jylla na ka por sha ka por.
Kiba bun ki nongrep bad kiba thied ïa ki marrep kiba dei ki Khasi ki la pynpaw ïa kane ka jingdonkam ban ïatylli kum ki Khasi ban ym ai lad satia ïa ki bar jylla ban leh trai khlieh ha ka kam khaïi pateng ha kane ka ïewduh ne ka ïewdielang.
“Ngin leh kumno haba baroh baroh ki la ïamonlang lang bad ïa mynjur ban ïa kheiñ ïa kata ka jingshah ot kilo ki marrep ne ban thew ïa ka jingkhia jong ka byrni, hynrei lada baroh la ïa beit lang ban ym ai shuh ïa ki marrep lada shah ot kilo u nongkhaïi jhur bar jylla um banse ban shim la ka shim,” ïathuh katto katne ngut ki nongrep haba ïakren bad u nongthoh khubor dangshen.
Na ka liang jong ki, ki la pynpaw ruh ïa ka jingsngew lynngoh ba ki hap ruh ban siew ïa ka pisa ha ka por ba ki wanrah ïa ki mar jong ki sha ïewduh bad balei ba ïa ki mar kum u phan, u bindi bad kiwei ki jait jhur kiba wanrah na bar jylla ne na ri thor ym donkam ban siew bai ot kilo, katba ïa u mar rep uba na ka jylla bad ba la thung ha ri Khasi hap ban siew ïa ka bai ot kilo.
Kumta ha kaba ïadei bad kane na ka liang jong ki nong rep bad kiba die ïa ki mar rep ki la long ba mynta ka donkam ka jingïatylli ban ym dei ban die ïa ki marep sha ki nongkhaïi bar jylla kiba kwah ban ot kilo ïa ki marrep jong ki naba kane kan ïarap lang ïa ki ban die noh sha kiwei pat.
Ha kaba ïadei bad kane na ka liang jong ki nongrep bad kiba die ïa ki marrep ki la kyrpad ïa ka KHADC ban shim khia ha kaba ïadei bad kane ka kam khnang ba kan pynsuk ïa ki kam khaïi jong ki na ka por sha ka por bad kumba ju long manla ka sngi.