Shillong, Jylliew, 25: Ka Jylla Meghalaya ka don kumba 2.5 lak antad ki nongdih drok ba kynthup ïa kiba injek drok bad ïa kiba dih da ki dawai watla ka la Sorkar ka la buh hakhmat ïa ka thong ban rat dyngkhong ïa ka jingisaitmet jong u drok hapoh san snem.
Haba kren ha ka jingrakhe ïa ka International Day against Drug Abuse and Illicit Trafficking kaba la long ha U Soso Tham Auditorium, u Symbud Myntri Rangbah ka Jylla u Bah Prestone Tynsong u la ong ba la donkam ban wanrah noh da ka mishon ban rat dyngkhong ïa u drok na kane ka jylla.
“Lada ngi don bun tylli ki mishon ban kyntiew ïa ka ïoh ka kot, la ka long ha ka rep ka riang, ha ka koit ka khiah bad kumta ter ter, ngi donkam ruh ban wanrah ïa ka mishon ka ban rat dyngkhong ïa ka jingjyllei jong u drok. Lada ka Sorkar ka lah ban bei pisa T. 10 klur ha kaba sdang kane kan ïarap shikatdei eh ban pynurlong ïa ka jingthmu,” u la ong.
Katkum ka jingong jong u, ka por ka la dei ban ïasnohkti lang kawei ban ïakhun pyrshah ïa kane ka jingisaitmet jongu drok kumba la ïasnohkti lang ha ka jingïakhun thma pyrshah ïa u khñiang jingpang Corona.
“Ka dei ban long da ka jingpynkhih u paidbah ban thaw ïa ka mishon. Namarkata, kane ka polisi kan sa treikam. Nga la bthah ïa u Principal Secretary in-charge Social Welfare da kaba ïasyllok bad ka tnat Pulit ban pynkhreh ïa kane ka mishon,” u la ong.
“Tang shu wanrah ïa ka mishon, ngeit ïa nga tang hapoh san snem nga nud ban ong ba ngin sa lah ban rat dyngkhong ïa ka jingjyllei jong u drok hapoh kane ka jylla Meghalaya,” ong u Bah Tynsong.
U Myntri ka tnat Kam Pohing ka Sorkar Jylla u Bah Lahkmen Rymbui u la banjur ba dei ban don ki jingpynshai bad ki jingpynsngewthuh sha ki skul bad ki kolej khnang ba ki khynnah skul bad ki samla pule kin dup sngewthuh ïa ka jingktah jong u drok. Dei tang ki samla kiba don ka bor ban ong em ïa u drok bad dei tang hangta ngin sa ïoh ka jingjop.
U Director General of Police (DGP) u Dr. Lajja Ram Bishnoi u la pyntip, katkum ka khanasamari 2019, haduh 2.5 lak antad ha Meghalaya ki don ki nongpyndonkam ïa u drok, kata, kiba shu pyndonkam da ki thyrnia injek bad kiba pyndonkam da ki dawai.
Na kine, ki don 11,420 ngut kiba ju pyndonkam da kaba shu injek da ki thyrnia, 43,620 ngut ki nongdie kynja, 1, 64,814 ngut kiba dei ki nongdih drok Opioid, 24,700 ngut kiba pyndonkam da ki dawai, 1300 ngut kiba kyrni ha u drok bad 1400 ngut kiba kyrni ha ki dawai kuli Amphetamine, ula ong.
Haba kren halor ka jinglong jingman jong ka jylla, u DGP u la ong, kane ka dei na ka daw ba ka Jylla Meghalaya ka ïajan bha bad ka Golden Triangle bad ka Meghalaya ka la long kum ka jaka shalan ïa u drok bad kane ka la pynlong ruh ïa ki bor badei peit ban long kiba peitngor bha.
U DGP u la ïathuh ruh ïa ki lynti shalan ïa u drok ha ka jylla Meghalaya bad ïa ki lynti ba la pyndonkam da ki nongkhaii drok.
U la ïathuh ba ka tnat Pulit ka la pynkhreh ïa ki buit treikam da kaba ïatreilang bad ki kynhun bapher bapher, nalor kaba pynlong ïa ki jingkhynra da ki bor jong ka aiñ bad da kaba pynlong ruh ïa ki jingpynshai bad ki jingpynsngewthuh sha ki khynnah skul bad ki samla pule bad ha ki shnong ki thaw.
U la pyntip ba ha ki 15 snei ba la leit noh ka tnat Pulit jong ka Jylla Meghalaya ka ladep pynlong haduh 142 tylli ki rynsan pynsngewthuh sha ki skul, ki kolej bad ha ki jaka paidbah ha kylleng ka jylla halor ka jingshyrkhei jong u drok bad kumjuh ruh sha ki 15061 ngut ki samla.
Shwa kane, ka Chief Secretary ka Kong Rebecca V . Suchiang ka la banjur ba ka long kaba donkam ban pynsngewthuh bha ïa ki samla pule ïa ka jingma jong u drok.
Ka la kyrpad ïa ki kmie ki kpa bad ïa ki nonghikai ba kin ai jingkyrshan bad ïada ïa ki khynnah pyrshah na ka jingshah pynngop ha u drok bad kaba donkam eh ka long ban ïatreilang ban pyllait ïa ki khynnah na ka jingshah ktah ha ka bor met bad ka bor pyrkhat.
Ha kane ka sngi, la pyni ïa ka jingïalehkai skit da ka Kripa Foundation De-addiction Centre for Juveniles, Mawkasiang bad ka jingphla jong ki nongpang ba la ïoh jingkoit kiba la shah sumar ha KJPA New Hope De-addiction Centre for Males, Mawdiangdiang bad na ka Kripa Foundation De-addiction Centre for Juveniles, Mawkasiang.
