Buh ïa ka thong kaei phin leh ynda ladep na College, kyntu u Myntri ïa ki samla pule Synod College

Shillong, Nailar 02 : Ka Synod College, Shillong ha ka 31tarik Naitung ka la rakhe ïa ka sngi khraw jong ki samla pule kiba pyndep ïa ka Graduate (2022 – 2025) ha ryngkat ka jingdonlang u Myntri ka tnad Labour ka sorkar jylla, Bah Shakliar Warjri kum u Kongsan.
Kane ka sngi ka dei ruh ka lyngkhuh dap 60 snem ka jingïaid lynti jong ka College ha ka jingshakri ïa ki samla pule ka jylla.
U Kongsan haba kren ha kane ka sngi u la ai ka jingïaroh ïa baroh ki samla kiba la pyndep ïa ka jingïaid lynti kaba kongsan tam jong ki ha ka jingpule. U la kyntu ruh ba ki dei ban buh ka thong kaei kaba kin leh nangne shakhmat hadien ba ki la dep ïa ka jingim kum ki samla pule College bad ban ïakhun ba kin poi sha ka thong ba ki don.
U Myntri u la kyntu ruh ïa ki ba kin pyndonkam hok ïa ka sap kaba ki don bad pynkynmaw ruh ïa ki ia kiba bun ki lad ki lynti kiba ka sorkar ka plie na ka bynta ka jingpyntbit ïa ki ha ki sap ba ki don khamtam ha kaba seng kam lajong.
Ha kane ka sngi khraw ka la don ruh ka jingsam ïa ki khusnam ba kyrpang sha ki samla kiba la paw kyrteng ha ka thup jong ka North Eastern Hill University Merit List.
Katto katne na kine ki kynthup ïa u Manuel L. Rynghang uba la shah pynkup burom da ka Primrose Gatphoh Memorial Award da kaba ïoh 1st Position, BCA Honours.
La donlang ruh ha kane ka sngi naduh u President jong ka Governing Body, Synod College, Principal, Vice Principal, IQAC coordinator, ki kmie ki kpa, ki nonghikai nalor kiwei kiwei.