Hapoh 3 bnai ïohkem ki BSF 116 ngut ki Bangladeshi, kurup ïa ki mar khaïi tuh ba palat 39 lak

Shillong, Nailar, 02: Ki shipai Border Security Force (BSF), Meghalaya Frontier kiba peitngor ban ïada ïa ka khappud Indo-Bangladesh khnang ban khanglad ïa ki kam runar ruser ha khappud, hapoh lai bnai, kata, naduh ka 25 tarik, Ïaiong haduh ka 25 tarik, Naitung, 2025, la pyntip ba ki la ïohkem haduh 35 ngut ki briew, 23 ngut ki dei ki nong India bad 12 ngut ki dei ki mynder Bangladeshi kiba donkti ha ka jingshalan ïa ki mar khaïi tuh lyngba ka khappud.
Ha u kyrwoh la pyntip ba ka tnat shipai BSF ka la ïoh kurup ruh ïa ki mar khaïi tuh kiba shongdor palat T. 39 lak.
Dang shen ki shipai BSF Meghalaya ki la ïoh kurup ruh ïa ki mobile ba shongdor palat 31 lak, ïa kiba la suba ki dei kiba la thmu ban khaïi tuh.
Ha kine ki lai bnai, ki shipai BSF ki la ïoh kem haduh 116 ngut ki mynder Bangladeshi bad 34 ngut ki nong India halor ka jingdonkti ban jam beaiñ sha pud u sam ka ri India bad kiba donkti ha ki kam khaïi mar tuh.
Napdeng kin, saw ngut ki dei ki nongkdew lynti, arngut ki nong India bad arngut ki mynder Bangladeshi.
Kine ki jingïohkem ïa kine ki mynder bad ïa ki nong India ka long da ka jingïatreilang bad ki Pulit ka jylla Meghalaya.
Ki shipai BSF kiba la pynjur ruh ban peitngor bha ïa ka jingkhaïi tuh ki la ïoh kurup ïa ki mar khaïi tuh bad 622 tylli ki masi, kiba shongdor antad kumba T. 7.5 klur. Ki mar khaïi tuh ba la ïoh kurup ki kynthup ïa ki dawai kuli Yaba, u Ganja, ka kiad, ki jingtah khmat, ki jaiñ bad kiwei kiwei ki tiar ba la thmu ban shalan tuh lyngba ka khappud.
Nalor kaba peitngor ïa ka jingpahara ha khappud, ki shipai BSF Meghalaya ki la buh hakhmat ïa ka thong ban wanrah ïa ka jingïadei kaba jan bad ki paidbah kiba shong basah ha khappud khnang ban pynïoh ïa ki lad jingïarap ba donkam sha ki paidbah kiba sah ha ki shnong khappud.
Ha kiba bun ki khep, ki shipai BSF ki la ïarap ruh ban ai jingsumar ïa ki nongjngohkai pyrthei ba donkam jingsumar kyrkieh, ban pynkit ïa ki nongpang sha ki jaka ai jingsumar na ki shnong nongkyndong da kaba pyndonkam ïa ki kali Ambulance ki shipai. Nalor kata, ki ïarap ruh ban sumar wat ïa ki riewpaidbah kiba mynsaw haba donkam kyrkieh.
Dang shen, ka tnat shipai BSF Meghalaya ka la ïarap ban pynkit da ka Ambulance na Umkiang PHC ïa ka Kong Berlin Tariang sha Silchar ban ïoh ïa ka jingsumar ba paka. Ha kawei pat ka khep, ki shipai ki la pyllait im bad pynkynriah noh ïa ki hynniew ngut ki riewpaidbah kiba la mynsaw hadien ka jingïatakhuh ka trok hajan ka Border Outpost Phanda ha kaba la pynkit ïa kiba mynsaw sha Baghmara Hospital ban ïoh ïa ka jingsumar.
Ban wanrah pat ïa ka jingïadei bad ki bor shipai ïada khappud na ka ri ba marjan, ka tnat shipai BSF Meghalaya ka ju pynlong manla ka khep ïa ki jingïalang bad ka tnat shipai Border Guards Bangladesh (BGB). Kine ki jingïalang ki long ban ïathir ïatai na ka bynta ban khanglad ïa ki jingrung tuh na khappud, ban ithuh ïa ki lynti khaïi tuh bad ban khanglad ïa ki runar kiba ju mlien ban khaïi tuh bad ban tei ïa ka jingïadei kaba jan bad ki shipai ïada khappud ka ri Bangladesh.
Katkum ka jingpyntip jong u Public Relations Officer (PRO) ka tnat shipai BSF Meghalaya, na ka jingtohkit ïa ki nongkdew lynti bad ïa kiba rung beaiñ la lah ban ïoh ïa ki jingtip kiba kongsan. Ïa kine ki jingtip la ïasam bad kiwei pat ki tnat treikam khnang ban khanglad ïa ki kam runar ruser ha khappud.
Ka tnat shipai BSF Meghalaya ka la pynneh skhem ïa ka rukom treikam kaba khanglad bad ka ban pyrkhing ïa ka jingrung tuh ki mynder ri bad ka jingkhaïi tuh ha khappud.