Shillong Naitung 02 : Ban pynsuk ïa ki paidbah ka constituency ha ka leit ka wan khnang ba kin lait na ka dheng kali kaba ju tuh bun bha ka por tang ha surok, na ka liang u Bah Sanbor Shullai MLA ka Shillong South u la lah ban pynkohnguh ïa ki shipai ba kin ai jaka ban shna ïa ka surok kaba iaid nakhmat ka phyllaw Iing Dorbar ka jylla ha Rilbong bad mih pat shaduh jan Jingkieng Umshyrpi.
Ban buddien ïa ka jingïaid ka kam, u Bah Sanbor ha ka step sngi Saitjain u la hiar baroh shi lynter katei ka surok ryngkat ki engineer ka tnat PWD (Roads) bad ki nongïalam jong ki Phra tylli ki Dorbar Shnong kiba hap ha ka Raid Laban.
Haba kren bad ki lad pathai khubor, u Bah Sanbor ula ïathuh ba u la ïakhun la kumba shisnem ei ei bad ki shipai ban ïoh jaka na ka bynta ban shna ïa kane ka surok da kaba leit ban ïakren bad ka Defence Ministry. U ong ruh ba ka jingleit buddien khlem sangeh na ka liang ka tnad ruh ka la ai ïa ka NOC ban ai jingbit na ka bynta ban shna ïa katei ka surok ha ka jaka jong ki shipai.
Shuh shuh u la ong ruh ba ynda la dep kane ka surok, ka jingkhapngiah na ka dheng kali ki ha ki thaiñ Rhino sha Rilbong Lad Umshyrpi yn sa lah ban weng noh la kumno-kumno hapoh u Kyllalyngkot jong u snem 2026, ha kaba yn lah ban plie noh ïa katei ka surok kaba la mang ha ka jinglut kaba kot sha ka 6.33 klur tyngka.
U la ïathuh ba ha kane ka jingjurip na ka liang ki engineer ka tnat PWD (Roads) ki la aiktien ba ka kam ka la ïaid stet ban pyndep ïa katei ka surok bad ki la pynthikna ba la kumno- kumno ha u Kyllalyngkot jong u snem ban wan yn lah ban plie noh ïa ka na ka bynta ban pyndonkam ki paidbah.
U Bah Sanbor u la ong ruh ba na ka liang ka tnad Arts & Culture jong ka Jylla ka la ai lang ïa ka jaka na ka bynta ban ïarap ïa ki paidbah ka South Shillong bad kumjuh ki shnong ba marjan ba kin ïoh ban ïaid lyngba katei ka surok ban lait na ka sahkut ha ka dheng kali.
Ha kajuh ka por, u Bah Sanbor u la ai khublei ruh ïa ka Sorkar kynthup ïa u Myntri Rangbah ka Jylla bad u Symbud Myntri Rangbah ba khmih ïa ka tnat PWD (Roads) Bah Prestone Tynsong kiba la kyrshan bad mang na ka bynta katei ka surok haduh ba kan da urlong.
