Pynrem jur u Myntri Kam Pohïing bad phah thwet jur ïa ki pulit ban ïoh kem ïa ki runar

Shillong, Jylliew 25 : Ka jingkylli kaba mih na kiba bun ba lang la ka dei ha ki ïew ki hat, ki ïing iap briew ne ha kino kino ki jaka ba ïa lum paidbah ka long beit hato ka Jaiaw ka la dei ka ktem jong ki nongtuh, nonglute, nongpyniap briew bad nongdih drok? Balei ba mih kane ka jingkylli ka long halor ka jingshah shoh jong kiwei ki jaidbynriew ha ka thaiñ Jaiaw kaba la ïai jia na ka por sha ka por. Tang shu la ïaid da kiwei ki jaidbynriew kiba ym dei ki trai ri trai muluk tang katta la shah dung, shah shoh shah lute beit.
Balei kane ka jia haduh katne hato ym dei ba la jur ki nongdih drok. Haba leit sha kiwei kiwei ki Dong ne Shong ym ju ïohi pulit shuh ban hap ap pahara hynrei ha Jaiaw pat naduh mynstep haduh mynmiet la hap ban pynap beit da ki kali bullet proof. Kane ka la kup ïa ka dur bym don shuh ka jingshngaiñ ha katei ka thaiñ.
Dang ha ka Sngi Thohdieng ki la don haduh ki la don ar tylli ki jingjia ha thaiñ Jaiaw kawei ka dei ka jingshah shoh jong ki arngut ki samla pule kiba na Kerala kiba wan pule pyntbit (internship) bad ka Impulse NGO Network namar ki leit donkam sha katei ka thaiñ bad rung bam jingbam ha kawei ka resturant. Kine ki dei u Rejaz M Sydeek bad Sarath S Thambi. Kine hadien ba la dep bam jingbam bad mut ban siew ïa ka bill la wan ki briew bym lah ban ithuh kiba shong da ki thuk thuk bad don kumba 30 ngut ei ei bad shoh beit ïa ki. Uwei pat u samla uba shah shoh u dei uba leit rah jingbam sha ïing briew na ka Swiggy bad haba la poi ha Mahari Petrol Pump,Jaiaw Langsning la mih 20 haduh 25 ngut ki briew kiba la shoh beit ïa u.
Ha ki por ba mynshwa kiwei ki jaidbynriew ki tieng ban leit dei tang sha Mawlai hynrei mynta mar khongpong ki briew ki la tieng eh ban ïaid lynti ha Jaiaw hynrei shngaiñ ha Mawlai. Ha Mawlai ki don bun kiwei ki jaidbynriew kiba pule ha NEHU kiba ïaid da ka kjat teng teng shaduh Mawdatbaki bad Mawroh ruh hynrei ym ju lei lei ki shngaiñ ka ïaid ka ïeng. Kane ka pynpaw ba kiba la nang la stad ki la bun mynta ha Mawlai imat.
Ha Jaiaw tang shu wan kit mar da u daju ruh lah shah shoh bad shah ktah kti beit . Dang ha ka taiew ba la dep la don uwei uba shah dung ha ki thaiñ Jaiaw.
Halor kine ki jingjia na ka liang u Myntri kam Pohïing ka jylla u ma Lahkmen Rymbui u la pynrem jur bad ula bthah ïaki bor pulit ba ki dei ban thwet jur bad kem ïa kine ki kynhun shoh briew ha ki thaiñ Jaiaw.
“ Nga pynrem jur ïa ki briew kiba la shoh ïa ki arngut ki samla pule na Kerala ha Jaiaw bad kane ka pynpaw ba ki don ki runar kiba kwah ban wanrah ïa ka jingshong syier bad jingumsnam ha ka ne ka nongbah” ong u ma Lahkmen.
U la ïathuh ba ki pulit ki la rejister case bad ka jingtohkit ka la ïaid shakhmat bad u kyrmen skhem baki pulit kin sa ïoh ban kem ïa kine ki briew kiba donkti ha kine ki kam shoh briew.
Na ka liang u DGP ula ïathuh ba ki pulit ki dang bishar ïa ki dur ba la ring da ka CCTV ban ithuh ïa kitei ki briew kiba donkti. U la kular ruh ban thwet jur haduh ban da ïoh kem ïaki.
U la kyntu ruh ha kajuh ka por ïaki samla ba kin kiar na kine ki kam pyntriem namar wat la ki leh hapdeng ka jingbuaid ruh ki dei ban sangeh ïa kum kine ki jaitkam. Ki dei ban wan shakhmat bad pynpaw kiei ki jingeh jongki khnang ban ïoh ïarap bad pynbeit ïakita ki jingeh kiba ki ia kynduh ong u DGP.