Nongpoh, Nailar 02: Kum uwei na u samla ba paw ha Ri Bhoi District bad u nongïalam ka NPP ha Ri Bhoi bad u dkhot ka NPP ha Jirang Constiteuncy, u Samla Albertus Lapang mynta ka sngi, haba la leit ban pynïasoh ïa lade sha ka party BJP ha Jirang, u la ther tyngeh ïa ka Party NPP ba ka dei ka party kaba wan rah jingkylla tang ïa ki nongïalam ba hakhmat eh bad ym na ka bynta ka jingkylla ki paidbah hapoh ka jylla.
U la ther tyngeh ruh pyrshah ïa ka party NPP ka dei ha ka jingïalang ba ka party BJP na Ri Bhoi bad na Jirang Mondal mynta ka sngi ki la pdiang burom ïa u bad kiwei ki nongïalam na ka NPP, UDP bad Congress kiba la wan ban pynïasoh sha ka BJP party ha ka jingïalang kaba la long ha Dorbar Hall ka Shnong Harlibagan ha Byrnihat.
Ïa u samla Albertus Lapang bad ki wei kiba la wan ban pynïasoh sha ka BJP party, la pdiang burom da u President ka State Yova Mocha u Bah Mewaker Lyngdoh,m u President ka BJP Ri Bhoi, u Bah Sen Thabah lem bad kiwe ki nongïalam ka BJP na Jirang bad na Ri Bhoi District.
Haba kren ha kane ka sngi, u Samla Albertus Lapang, u la ong ba ka daw kaba la pynlong ïa u ban shim ïa ka rai ban pynïasoh noh sha ka BJP party ka dei halor ka nongrim ba u kwah ba ki paidbah kin ioh jingmyntoi bad ym kumba long ka NPP party ba kiba ioh jingmyntoi ki dei tang kito ki nongïalam ba hakhmat ha kaba tang hapoh 2 ne 3 snem ki la kylla riewspah bad poi sha kata ka kyrdan High Level.
U la ong ruh dei ha ka jingïalam u Myntri Rangbah ka ri, u Narendra Modi ba bun ki jingkylla ha ka roi ka par ki poi sha ka jylla Meghalaya bad ym kata party NPP kaba wan rah ïa kata ka jingkylla. U la ong ruh ïa kane la sakhi ba kiwei ki state ba synshar ka BJP ki ioh bun ki kam pynroi, namar baroh ki dei ki kam pynroi kiba wan rah da ka party BJP.
Shuh shuh, u la bynrap ruh da kaba ong, ba bun ki ïa kren sha ka party BJP ba ka dei kata ka party ba lehbein ïa ki Khristan bad kane ka dei tang ka jingpynsngewthuh bakla kiwei, hynrei ka BJP ka dei kawei na ka party kaba kdup ïa baroh bad kumba long mynta ki paidbah ha ki jylla bad ka ri, ki ioh jingmyntoi lyngba ki kam pynroi ba la wan rah da ka party BJP, u la bynrap.
Lyngba jong kane ka sngi, kum ka jingburom ïa uwei u samla uba la wan rah nam wan rah burom ïa ka District bad ka jylla hi baroh kawei, ka BJP Jirang Mondal ka la pynkup burom ruh ïa u Samla Johny Nongrum, uba dei u rangïakura MMA ba paw ha ka jylla, kaba long shi bynta ka jingburom ïa u halor kitei ki nam jop kiba u la ai burom ïa Jirang Constituency, Ri Bhoi District bad ha ka jylla hi baroh kawei.
