Ïashim bynta ki nongrep ha ka prokram pynlait paidbah ïa ka 20th Instalment PM Kisan Scheme

Shillong, Nailar 02: Ka prokram ka ban pynïasohlang bad ka ri baroh kawei ha ka jingpynlait ïa ka 20th Instalment ka PM Kisan Scheme da u Myntri Rangbah duh ka ri u Narendra Modi la pynlong mynta ka sngi ha Integrated Agricultural Training Centre, Upper Shillong.
Ïa kane ka prokram ha ka jylla la pynlong lang da ka Directorate of Agriculture and Farmers’ Welfare, Krishi Vigyan Kendra East Khasi Hills bad ka Meghalaya Agricultural Management and Extension Institute.
Ha kane ka prokram la wan ban ïashim bynta da ki nongrep na kiba bun ki C&RD Block jong ka East Khasi Hills district ha ryngkat bad ki ophisar na ka tnat, KVK, ATMA bad kiwei kiba la shah khot sngewbha.
Ïa kane ka prokram la wan ban long kongsan da ka B. Mylliem Umlong, Director of Agriculture, ha kaba ha ka jingkren ka la pynshlur ïa ki nongrep ban shim ïa ka lad ka kabu ïa ka skhim PM Kisan Scheme ba la ai da ka sorkar pdeng.
Shuh shuh ka la batai bniah shaphang kiba bun ki lad bad ki jingdonkam jong kane ka skhim. Kum shi bynta na ka prokram, ka la don ruh ka jingïasyllok hapdeng ki ophisar bad ki nongrep ha kaba la jubab ruh ïa ki jingkylli ba la buh da ki nongrep.
La pyni ruh ïa ka live streaming jong ka prokram ba la pynlong ha Vanarasi UP bad ba la shim bynta da u Myntri Rangbah duh ka ri kaba la pyni paidbah ha kane ka sngi. Lyngba kane ka prokram kaba la plie paidbah ha ka ri, ki la don kumba 2.5 klur ngut ki nongrep kiba la shim bynta ha kaba la pyllait ïa ka 20th Instalment ka PM Kisan Scheme kaba shongdor T. 20,500 klur ha kaba ïa kane ka pisa la thep sha ki bank account jong ki 9 klur bad 70 lak ngut ki nongrep ka ri baroh kawei.