Shillong, Jylliew 25 : Ki pulit ki la ioh ban kem biang mynta ka sngi ia u koidi uba lait phet na phatok Jowai u Shiningstar Pala naduh ka 22.6.2022 hadien ka jingthwet jur bad ka jingïatrei lang bad kiba haïing hasem jongu.
Ki pulit ki la bud dien ïa u naduh ka khyllipmat kaba u lait phet hi namar kat shaba u don ki pulit ki lap dien beit tangba shu ïalait beit da ka said hynrei mynta ka sngi ula ngat ha shrip ki pulit. Dei ruh ka jingïatrei lang jong kiba haïing ba la ïoh ban kem biang ïa u.
U Shiningstar u dei na Wahiajer bad u la shah rai pynrem bad shah set phatok naduh ka 9 tarik Jymmang 2022. Hynrei ha ka 22 tarik katba u dang sait ïa ka Ambulance habar ka phatok ha ka por 2.30 ei ei janmiet ula ïoh ban phet bak.
