Ka sorkar MDA ka pdiang sngewbha ban wan tohkit ka SC ne kino kino ki kynhun halor ka kam tih bad khaïi dewiong : Dy CM

By Mawphor Editor On Aug 2, 2025

FILE PHOTO: Labourers work at a coal stockyard in East Jaintia Hills in Meghalaya, India, September 16, 2015. . REUTERS/Krishna N. Das

Shillong, Nailar 1 : Ka sorkar jylla ka la bthah ïa ki bor District ban tohkit halor ka jingjah rngai jongu dewiong ba 4000 metric ton ong u Symbud Myntri Rangbah bah Prestone Tynsong.
Kumjuh ruh u la ong ba ka sorkar MDA ka pdiang sngewbha ïa ka jingtohkit da ka Suprme Court ne da kano kano ka Kynhun (Agency) jongka sorkar pdeng halor ka jingkynnoh tih bad khaïi dewiong beaiôñ ha ka jylla.
U Symbud Myntri Rangbah u la ïathuh ïa kane ka jingtohkit la bthah ban leh bad pyndep hi da ki bor synshar district ban lap kumno une u dewiong u jah rngai bad lada lap ïa kiba donkti ka aiñ kan nym map hynrei kan leh ïa kaba donkam.
“ Ngi la bthah ïa ki bor synshar district jongkato ka district kaba jah rngai u dewiong ban tohkit bniah ban lap ïaka jingshisha bad ban ai ïa ka kaiphod sha ka sorkar jylla khnang ba da katei ka juh ka kaiphod ka sorkar kan ïoh ban phah sha ka sorkar pdeng namar ka sorkar pdeng ruh ka la pan jingpynshai halor katei ka jingjah rngai u dewiong” ïathuh u bah Prestone haba ïakren bad ki nongthoh khubor.
U la kyntait mardor ban kynthoh halor ka jingkren jong u Myntri sorkar u ma Kyrmen Shylla ba u dewiong ba 4000 matric ton u lah ban shah rong ha ka um sha Bangladesh da kaba ong “Ngam don ei ei ban ong halor kane ka jingkren”. Kane ka jingjah rngai u dewiong la lap da ka Committee ba marwei jongu Justice BP Katakey bad u la ai jingtip ruh sha ka ïing bishar High Court ka jylla.
Halor ka jingtohkit u la ong “ La ka dei da ka Supreme Court ne da kano kano ka Kynhun tohkit (Agency) jongka sorkar pdeng kumba nga ju ong baroh shi katta halor kata ka kam khaïi beaiñ ïa u dewiong, ne ka jingtih beain ïa u dewiong ka sorkar ka kloi ban pdiang ban wan tohkit namar kam don satia kaba kum kata namar lada ka don ruh ka aiñ kan ym map ia kiba donkti”.
“ Ka sorkar na ka por sha ka por ka bthah ïa ki bor synshar district ïa ki SP, ia ki tnad sorkar ba dei peit ïa ka kam ban pynthikna ba kam dei ban don kano kano ka kam beaiñ halor u dewiong” pynkut u Symbud Myntri Rangbah.