Shillong, Nailar 01: Da kaba kynthup ïa ka South West Garo Hills ryngkat bad ka jylla baroh kawei ha kaba ïadei bad ka jingkyntiew ïa ka jingïalehkai phutbol, ka Meghalaya Football Association ka la aiti ïa ka syrnod jingithuh lane ka ‘provisional affiliation certificate’ sha ka Ampati District Football Association.
Ïa kane ka syrnod la aiti sha ka ADFA da u President ka MFA u Bah Hamletson Dohling hynne ka sngi ha ka jingïalang kaba la long ha Ampati Circuit House.
“Ngi sngewkmen haduh katta katta ba ngi la ïoh ban aiti ïa ka provisional affiliation certificate’ sha ka Ampati District Football Association ha ka jingleit jong ka Synjuk kylleng ka rilum Garo,” la ong u President ka MFA.
Ka jingïasoh bad ka MFA kan plie lad shuh shuh ïa ki nongïalehkai bad ki klob na South West Garo Hills ban ïashim bynta pura ha ki jingïalehkai phutbol ka Meghalaya bad ha ki lympung ïalehkai ba la pynlong da ka MFA.
Kiba la don lang ha kane ka jingïalang ki kynthup ruh ïa u General Secretary ka MFA u Bah Sunesh Syiem, Vice-Presidents u Dr Lumbor Mawsor bad u Salja Marak ryngkat bad ki dkhot jong ka Executive Member YG Lyngdoh. Na ka liang jong ka ADFA la mihkhmat da u Chairman u Clement G Momin, u Secretary u R Sangma bad kiwei kiwei ki dkhot.
Ka MFA ka la kitbok kitrwiang ïa ka ADFA bad ïa ki dkhot nongkitkam jong ka ba kin trei shitom ban kyntiew ïa ka jingïalehkai phutbol ha South West Garo Hills.
