Shillong, Naitung 31: Ka National Legal Services Authority (NALSA) da ka jingïatreilang bad ka Mediation and Conciliation Project Committee (MCPC), ka Supreme Court of India, kan pynlong ïa ka Special Mediation Drive (SMD) – Mediation ne ka jingïasyllok na ka bynta ka ri ha kaba ka Meghalaya State Legal Services Authority kan lah ruh ban pynlong lang ïa kane ka juh ka jingïasyllok (mediation drive) ha ka jylla hapoh ka jingïalam lynti u Justice I. P. Mukherjee, Chief Justice of the High Court of Meghalaya, Justice H. S. Thangkhiew, Judge, High Court of Meghalaya bad Executive Chairman, MSLSA bad Chairman MCPC bad Justice W. Diengdoh, Judge, High Court of Meghalaya bad Chairman, HCLSC.
Kane ka jingïalap jingïasyllok kaba 90 sngi ka long ban pynbeit ïa ki mukotduma ba dangsah ha baroh ki Sub-Divisional Courts, District Courts bad ka High Court ba kynthup ïa ki District Council Courts ha Meghalaya lyngba ki jingïapynbeit bapher bapher.
Baroh ki party ne kynhun kiba don mukotduma ha ki kyrdan bapher bapher kum ki jingïakajia shongkha shongman (Matrimonial), ki jingkam ba takhuh kali ne jingjia bym poi pyrkhat (Accident), ki jingïakajia ha la ïing, ka Cheque Bounce, ki kam kajia khaïi pateng, ki kam Service Matter, ka Criminal Compoundable, ki jingïakajia ha ka thied ka siew, ka jingsiew ïa ka ram, ka Partition, ki jingshah kyndang, ka jingkurup ne thied jaka bad kiwei ki mukotduma ba ïadei bad ki kam paidbah, kiba la ïohpdiang ki jingpyntip bad ka kam ba la phah ban ïoh ki jingpynbeit ba kin dei ban ïashim bynta ha kane ka mediation drive.
Kumta baroh ki kynhun kiba don ki mukotduma hapoh kine ki kyrdan bapher bapher, kiba mynta ki dang sah ha High Court of Meghalaya, ki District Court, District Council Courts, ba kin dei ban leit pynbeit ïa kane ka kam sha katei ka Mediation drive, ong ka kyrwoh ba la phah da Member Secretary, Meghalaya State Legal Services Authority.
