Shillong, Naitung 30: Ka Lapalang SC ka la donkam tang shi samoi ban kyntiew kyrdan biang ïalade sha ka lympung phutbol Third Division jong ka Shillong Sports Association hadien ba ka la jop ïa ka jingïakhun quarterfinal jong ka U-20 Fourth Division Football League 2025 da 1-0 kol pyrshah Laitlulong SC hynne ka sngi Balang ha madan First Ground-SSA Stadium, Polo.
Ka jingïakhun ka long kaba khluit haduh katta katta, ha kaba baroh arliang ki la pynduna sha ka 10 ngut ki nongïalehkai. Uwei na ki rangïalehkai ka Laitlulong u la shah sei syndon da ka red card hadien ba la kut ka jingïalehkai namar ka jingïa ñia bad u referee.
Katei ka kol kaba kongsan kaba la pynthikna ïa ka Lapalang ban ïohrung sha ka semi final la thep da u Emineki Pohthmi (56’). Kadei ka kol kaba wanrah jingartatien na ka bynta ka Laitlulong, ha kaba u assistant referee u la kaweh ïa ka lama na bynta ka offside hynrei u referee, uba bat ïa ka bor ba pura ban pynïaid ïa ka jingïalehkai, u la kaweh bad pyrta ba ka jingïalehkai kan bteng. Ki rangïalehkai ka Laitlulong ki la bakla borbah da kaba sangeh ha ka por ba la kaweh ïa ka lama shajrong na u Assistan referee bad ap ïa ka jingsawa ka whistle na u referee, ka bym shym la sawa. Hynrei na ka liang jong u Emineki u la bteng ban mareh pynstet shakhmat bad thep jlang.
Da kane ka namjop ka Lapalang ym tang ba kan ïoh ïakhun ïa ka semifinal hynrei ka la pynthikna ïa ka jaka sa shi sien ha ka Third Division na ka bynta ka samoi ban wan.
Ka jingïakhun Quarter final ha kane ka sngi Palei (31 tarik Naitung, 2025) kan long hapdeng ka Mawlynrei SC pyrshah ïa ka Golflink SC, ha ka por 3 shiteng nohphai sngi.
