Ka MRSSA ka la biang ban tehlakam ka jingwan rung ki bar jylla, ym donkam than da kawei pat ka aiñ: Hek

Shillong, Naitung 29: U MLA ka BJP bad u Myntri ka Sorkar jylla u Bah A L Hek ha ka sngi Ba-ar u la kynthoh da kaba kam ba ka Meghalaya Residents Safety and Security Act (MRSSA) ka la biang eh ban tehlakam ïa ka jingwan rung kyrthep ki bar jylla sha ka jylla Meghalaya bad ka jingwanrah da kawei pat ka aiñ kan nym long kaba donkam than.
U la ong, “Ka sobjek hi ka long kumjuh. Ngi kwah tang ban tehlakam ïa ka jingwan rung kyrthep ki briew ba nabar shapoh ka Jylla jong ngi. Lada ngi don ïa ka aiñ kaba khlaiñ bad kaba treikam bha kum ka MRSSA, balei ngi kwah sa kawei pat ka aiñ.”
Halor kane u Bah Hek ula ong ba ka MRSSA ka dei ka aiñ kaba khlaiñ bha ban peitngor bad pyrkhing ïa ka jingwan tuid ne ka rung ka mih ki briew ba nabar shapoh ka jylla Meghalaya.
“Ka MRSSA ka dei ka aiñ kaba biang bha ban tehlakam ïa ka jingwan tuid ki briew bad ban pynthikna ïa ka jingshngaiñ jong ki nongjngohkai bad ki trai shnong,” la bynrap u MLA ka BJP.
U Myntri u la ong ba ka MRSSA ka ai bor ïa ki Dorbar Shnong bad ki trai ïing ban peit ïa ka jingwan tuid ki briew na shabar ka jylla da kaba ïada ïa ka bha ka miat ki trai shnong jong ka jylla Meghalaya.
Na ka liang jong u, ula pyntip ba ïa ka jingtyrwa ban pyntreikam pura ïa ka aiñ MRSSA yn sa ïakren hapoh ka jingïalang jong ka kynhun Myntri Sorkar Meghalaya naba kane kadei ka kam kaba donkam.