Shillong, Naitung 27: Ki don 30 ngut ki nongïalehkai kiba la paw kyrteng ha ka thup ba la jied na ka bynta ka kynhun ïalehkai kriket Under-23 ki shynrang jong ka Meghalaya ka ban mihkhmat ïa ka jylla ha ka samoi ïalehkai 2025-26 jong ka BCCI, ka ban sdang na ka lympung Col CK Nayudu Trophy ha u Risaw.
Ka kynhun ki nongjied jong ka Meghalaya Cricket Association ki la pynmih ïa kane ka thup da kaba pynshong nongrim ïa ka rukom ïalehkai jong ki player ha ka Selection Trial ba dang shen bad kumjuh ruh da kaba bishar bñiah ïa ki jingïalehkai jong ki ha ka samoi ïalehkai 2024-25 bad 2023-24.
La pyntip ruh ba ka MCA kan pynlong ïa ka jingpyrshang jied bad pynkhreh kaba khatduh ha kaba sdang jong u bnai Nailur bad la ai jingmut ïa ki nongïalehkai kiba la shah jied ba kin ïai bteng ban shah hikai bad ban kilanmet, ong ka kyrwoh ba la pyllait da u Secretary jong ka MCA, u Rayonald Kharkamni.
Ka samoi ïalehkai kriket jong ki U-23 kan sdang na ka lympung (multi-day) Col CK Nayudu Trophy naduh ka 16 tarik Risaw, bud sa ka lympung ïalehkai One Day U-23 Men’s State A Trophy naduh 09 Naiwieng.
Ki rangïalehkai kiba la paw kyrteng ki long: Gavineal J Marpna, PM Santosh, Kevin S Christopher, Purav Agarwal, Rohit Yadav, Gulgul Sangma, Manish Sharma, Asif Khan, Navin Kumar Ray, Salchang Sangma, Appante Waldora A Sangma, Denikcheng Marak, Chandra B Thapa, Banialam Mylliemngap, Pushkar Raj Singh, Josiah Momin, Raghav Magotra, Sachin Kumar, Avinash Rai, Kshitij Singhania, Charm Marbaniang, Rituraj Rabha, Dipankar Baruah, Sudhir Sahani, Manthan Dey, Shavian P Blah, Ayushman Das, Thunun Marak, Superson Lyngdoh, Dairo Marak
