Nongstoiñ, Naitung, 25: Ka jingpynjur jong ka Sorkar Assam ban khynra bad ban kyndang ïa ki mynder ri kiba shong beaiñ hajan ki shnong khappud kiba don markhap bad ka jylla Meghalaya ka la pynlong ïa ki Dorbar Shnong ban long pynlong ka jingpeitngor ïoh ba kumno re kumno ki mynder ba la suba ba ki lah ban dei ki mynder Bangladeshi kin ïoh rung shapoh ka jylla da kaba pyndonkam da kiba bun ki lad ki lynti.
La suba ba ki mynder Bangladeshi kin shu phah shna thok ïa ki kot ki sla kum ka Adhaar Card, ka EPIC bad kiwei kiwei ban kam ba ki dei ki nong India.
Ki nongsynshar jong ki shnong Khasi kum ka Athiabari, Umsaitwait haduh Kyrshai bad kiwei kiwei ki la pyntip ba naduh ba ka Sorkar Assam ka la sdang ïa ka jingkhynra ki nongsynshar shnong ryngkat ki paitbah ki la peitngor bha hynrei haduh mynta ym pat lap ba yn don ki mynder ri kiba wan rung beaiñ sha ki shnong ki thaw jong ki.
U Bah Nastar Kharlyngdoh uwei na ki riew rangbah na ka shnong Athiabari haba ïakren bad u Mawphor u la ong ba ka shnong Athiabari bad ka shnong Umsaitwait ryngkat ka jingïatrei lang bad ki Pulit ka Anti-Infiltration Check Gate ki la peitngot bha miet la bad sngi ban talasi bad ban ym ailad ïa kino kino ki briew kiba nabar ka jylla ki bym biang ki kot jingpynshisha ba kin ïoh rung shapoh Meghalaya.
Ha kaba ïadei bad ka jingpeitngor ïa ka jingwan rung jong ki mynder hapoh ka jylla, ki nongïalam jong ka Federation of Khasi Jaiñtia & Garo People Mawshynrut circle ruh ki la shimkhia bha bad ha ka sngi Thohdieng ki la hiar sha ka shnong Athiabari ban ïakynduh ïa ki Pulit ka Anti-Infiltration Check Gate bad ai ka jingkyrshan bad ban ïatrei lang bad ki ha kaba talasi ïa ki kali kiba rung shapoh West Khasi Hills District.
Nalor kata ka don sa kawei ka surok kaba rung sha West Khasi hills na Kamphaduli sha Langpih haduh Mawsikar kaba ym don khyrdop talasi mynder satia namarba kane ka jaka ka dang don hapdeng ka jingbym pat lah ban ïa pynbeit ïa u pud u sam ba thikna bad ka Assam hynrei ki briew kiba la shah khynra na Assam kim don lad satia ban rung lyngba katei ka surok namarba ki Nepali bad ki Khasi kiba sah ha ka thaiñ Langpih kim ailad satia.
Kumba ka long haduh mynta ki mynder kiba ïoh lad ban rung sha West Khasi Hills kan long tang na Garo Hills lyngba ka surok na Assam sha Tura bad na Tura pat ki sa wan kiew ha Shahlang namar tad haduh kine ki sngi ha ka thaiñ Shahlang palat marshiteng na ki nongshong shnong ki la dei ki bar jylla.
