Shillong, Naitung, 25: U Symbud Myntri Rangbah ka Jylla uba khmih ïa ka tnat Kam Pohiing Bah Prestone Tynsong u la ïathuh ba ym pat ïoh jingtip eiei ruh em ba kin don ki mynder ri ba wan rung beaiñ sha ka jylla Meghalaya.
“Tad haduh mynta ngim pat ïoh jingtip halor kano kano ka jingrung tuh (ki mynder ri shapoh ka jylla),” ong u Bah Tynsong ha ka jingïakren bad ki lad pathai khubor da kaba kular ba ka Sorkar kan sa pyntip paidbah lada don kano kano ka jingrung tuh jong ki mynder ri.
U Bah Tynsong u la pyntip ruh ba ka Sorkar Jylla ka la shim ïa ki sienjam ba kongsan ba khanglada ïa kano kano ka jingwanrung tuh jong ki mynder, khamtam eh halor ka jingkyndang bad ka jingkhynra ïa ki mynder ri ha ka jylla Assam.
“Ha ka jingshisha, ngi ladep shong ïa ka jingïalang pyrkhat kam bad ki tnat treikam ba dei peit. Ngi la bthah ïa ka Director General of Police (DGP) bad ïa baroh ki Deputy Commissioner bad ïa ki Superintendent of Police ba kin long kiba peitngor bha lada jia ba ka don kano kano ka jingpyrshang ban wan rung tuh jong ki mynder lyngba ka jylla Assam (kiba lah ban) pyrshang ban rung jubor shapoh ka jylla Meghalaya,” u la ong.
U Symbud Myntri Rangbah u la ïathuh ba ki bor pahara, kynthup ruh ïa ki shipai BSF, ka tnat Custom bad ki bor Pulit ki la long kiba peitngor bad la bthah ïa ki ban kham pynjur shuh shuh ïa ka jingpeitngor ban ïohkem ïa kino kino ki mynder ri kiba pyrshang ban wan rung tuh shapoh u pud u sam jong ka jylla.
